सुनसरी । चालू आर्थिक वर्षमा ३६ अर्व ७४ करोड ४९ लाख रूपैयाँको बजेट ल्याएको कोशी प्रदेश सरकारले यो पटक आकार घटाएर बजेट ल्याउने तयारी गरिरहेको छ ।
केन्द्रीय अनुदान घटेको र आन्तरिक राजश्व पनि लक्ष्य अनुसार उठ्न नसकेका कारण सरकारले चालु आर्थिक वर्षको भन्दा सानो आकारको बजेट ल्याउने तयारी गरेको हो । प्रदेश सरकारले आर्थिक वर्ष २०८१/८२ का लागि असार १ गते बजेट ल्याउँदै छ । कोशी प्रदेश सरकारले सडक, पुल जस्ता भौतिक पूर्वाधार निर्माणलाई प्राथमिकतामा राखेर बजेट ल्याउने तयारी गरिरहेको आर्थिक मामिला तथा योजना मन्त्री राम बहादुर मगरले जानकारी दिए ।
सरकारले भौतिक पूर्वाधार निर्माणलाई प्राथमिकतामा राखेर बजेट ल्याउने तयारी गरेको छ । तर नागरिकले भने रोजगारी श्रृजना, शिक्षा, स्वास्थ्य, महिला, गरीव, दलित, जनजाती लक्षित बजेटको अपेक्षा गरेका मोरङ कटहरीका राम कुमार विश्वकर्माको भनाई छ । नेतृत्व महात्वाकांक्षी भएर स्रोत सुनिश्चित नगरी शुरू गरिएका कोशी प्रदेशका अधिकांश बहुवर्षिय योजना अलपात्र छन् । प्रदेशका बहुवर्षिय योजना सम्पन्न गर्न नौ खर्बभन्दा बढी रकम आवश्यक पर्ने अधिकारीहरू बताउँछन् ।
अहिलेको बजेटको आकारलाई आधार मानेर वार्षिक बजेटको सबै रकम शुरू भइसकेका बहुवर्षिय योजनामा लगाउने हो भने सबै योजना पुरा हुन ३० वर्ष लाग्ने देखिन्छ । स्रोत सुश्चित नगरी शुरू गरिएका यस्ता बहुवर्षिय योजना धेरै भएका कारण सरकारले नयाँ योजना र कार्यक्रम ल्याउन सक्ने अवस्था यसपाली पनि छैन् । आर्थिक वर्ष २०८१/८२ का लागि संघीय सरकारले कोशी प्रदेशलाई विभिन्न अनुदान शीर्षकमा २९ अर्व १० करोड ५२ लाख रूपैयाँ दिँदैछ । प्रदेशले करिव चार अर्व रूपैयाँ आन्तरिक राजश्व उठाउँछ । प्रदेशको आय ३३ अर्ब १० करोडको हाराहारी भएकाले यथार्थपरक बजेट ल्याउन विज्ञहरूले सुझाव दिएका छन् ।
