सङ्खुवासभा । सङ्खुवासभामा ट्याम्पो चोरीमा संलग्न रहेको आरोपमा दुई जनालाई प्रहरीले पक्राउ गरेको छ। सङ्खुवासभाको खाँदबारी नगरपालिका ८ बिष्णेधाराका हिरा धन राईले आफ्नै घर अगाडी पार्किङ गरी राखेको अटो चोरी भएको थियो । राईको को २ ह १५५० नम्बरको ट्याम्पो बुधवार राती हराएकोमा तत्काल खटिएको प्रहरी टोलीले खोजतलास गर्ने क्रममा मिति बिहीबार खाँदबारी नगरपालिका ९ भेडेटार स्थित सडकमा दुर्घटनाग्रस्त अवस्थामा फेला पारेको जिल्ला प्रहरी कार्यालय सङ्खुवासभाले जनाएको छ।
चोरीमा संलग्न खाँदबारी नगरपालिका ९सार्की डाँडा बस्ने वर्ष १८ का हरि मंग्रातीलाई विमानस्थल सुरक्षा गार्ड तुम्लिङटार सङ्खुवासभाबाट खटिएको प्रहरी टोलीले पक्राउ गरेको हो । अनुसन्धानको क्रममा उक्त ट्याम्पो चोरीमा संलग्न रहेका अर्का व्यक्ति सोही ठाउँका १९ वर्षीय किरण रम्तेललाई समेत नियन्त्रणमा लिएको सङ्खुवासभा प्रहरीले जनाएको छ।
पक्राउ परेका दुवै जनालाई सङ्खुवासभा जिल्ला अदालत चैनपुरबाट म्याद थप भई मुलुकी अपराध संहिता, २०७४ बमोजिम थप अनुसन्धान भई रहेको जिल्ला प्रहरी कार्यालय सङ्खुवासभाका प्रहरी निरीक्षक अभिषेककुमार श्रेष्ठले जानकारी दिए ।
