खोटाङ । खोटाङ र उदयपुर जिल्लालाई जोड्ने सुनकोशी नदीस्थित बंसिलाघाटमा अस्थायी बेलिब्रिज जडान गर्न माग गरिएको छ।
भौतिक पूर्वाधार तथा यातायात मन्त्रालय समक्ष खोटाङको बराह पोखरी गाउँपालिका-५ पौवा सेरा र उदयपुरको चौदण्डीगढी नगरपालिका–१ चौदण्डीगढीको सिमानामा पर्ने सुनकोशीस्थित बंसिलाघाटमा अस्थायी बेलिब्रिज जडान गर्न स्थानीय जनप्रतिधिले माग गरेका हुन्। यसका लागि मन्त्रालय सकारात्मक रहेको जनाइएको छ।
लामो समयदेखि झोलुङ्गे पुलमार्फत आवतजावत गर्दै आएका दक्षिणी क्षेत्रका स्थानीय बासिन्दा बंसिलाघाटमा बेलिब्रिज जडान हुने भएपछि हर्षित भएका छन्। अस्थायी बेलिब्रिज जडानका लागि खोटाङका बराह पोखरी र जन्तेढुंगा गाउँपालिका तथा उदयपुरको चौदण्डीगढी नगरपालिकाका जनप्रतिनिधिबिच हालै छलफल भएको छ।
जनप्रतिनिधिबिच भएको भेलाले बेलिब्रिज जडानका लागि तत्काल आवश्यक समान बंसिलाघाट ल्याउन मन्त्रालयसँग अनुमति माग गर्ने निर्णय गरिएको छ। यसअघि खोटाङबाट पूर्वी सहर जोड्ने सुनकोशी नदीकै फोक्सिङटारमा जडान गरिएको अस्थायी बेलिब्रिजका सामान बंसिलाघाटमा राख्ने तयारी सुरु गरिएको जनाइएको छ।
दुई जिल्लाका जनप्रतिनिधि बिचको छलफलमा चौदण्डीगढी नगरपालिकाका प्रमुख कालुमान लामा, जन्तेढुंगा गाउँपालिकाका प्रमुख करुणा राई, बराह पोखरी गाउँपालिकाका उपप्रमुख भुवल राई तथा तीनै पालिकाका वडाध्यक्ष, विभिन्न राजनीतिक पार्टीका नेता, स्थानीय सहभागी भएका थिए । बङ्सिलाघाटमा २०७५ सालमा एक करोड ४३ लाख लागतमा निर्माण गरिएको दुई सय ३५ मिटर लामो झोलुङ्गे पुल सञ्चालनमा छ। वारिपारि दुवैतर्फ कच्ची सडक निर्माण गरेर सञ्चालन गरिएको बंसिलाघाटमा भ्याटसहित १९ करोड १८ लाख ४१ हजार चार सय रुपैयाँ लागतमा निर्माण सुरु गरिएको मोटरेबल पक्की पुल अलपत्र अवस्थामा छ।
बंसिलाघाटमा निर्माण गरिने पक्की पुलका लागि निर्माण कम्पनीले २०७९ साल मङ्सिर १ गते सडक विभागसँग निर्माणको सम्झौता गरेको थियो। यद्यपि, ३३ महिनाभित्र सम्पन्न गर्ने गरी निर्माण सुरु गरिएको मोटरेबल पक्की पुलको काम अहिलेसम्म करिब २५ प्रतिशत मात्र सम्पन्न भएको जनाइएको छ।
तत्कालीन परराष्ट्र मन्त्री डा.नारायण खड्काले २०७९ साल पुस १ गते शिलान्यास गरेको पुल निर्माणको काम अहिलेसम्म अगाडि बढ्न सकेको छैन। बंसिलाघाटमा निर्माणाधीन मोटरेबल पुलमा ठेकेदारको ढिलासुस्तीले समस्या भएको बराह पोखरी गाउँपालिका प्रमुख शालिकराम बञ्जराले बताए। पुल बनाउने स्थान केही तल सार्नुपर्दा काममा ढिलासुस्ती भएको सडक विभाग पुल सेक्टर धरानले जनाएको छ।
मोटरेबल पक्की पुलको पेटी ठेक्का लिएर सम्पर्कविहीन बनेपछि मुख्य ठेकेदारलाई खोजेर निर्माण स्थलमा ल्याइएको थियो।
