विराटनगर । नेपाल प्रिमियर लिग ९एनपीएल० का लागि विराटनगर किंग्सको ट्यालेन्ट हन्ट कार्यक्रम कार्तिक २६ गतेबाट कोशी प्रदेशका ५ जिल्लामा सुरु हुने भएको छ ।
विराटनगर किंग्सको लागि ३५ जना खेलाडी हरेक जिल्लाबाट छानेर विराटनगरमा हुने तयारी क्याम्पमा सामेल गर्ने उद्देश्य सहित उक्त क्याम्प हुन लागेको विराटनगर किंग्सका अपरेसन डाइरेक्टर दीपेन्द्र चौधरीले जानकारी दिए । ट्यालेन्ट हन्टमा टिमका क्रिकेट कोच लाक्पा लामा र दीपेन्द्र चौधरीले छान्ने छन् ।
कोशी प्रदेशको इलाममा कार्तिक २६ गते , झापामा कार्तिक २७ गते ,सुनसरीमा कार्तिक २९ गते, उदयपुरमा कार्तिक ३० गते , मोरङमा मङ्सिर २ गते उक्त ट्यालेन्ट हन्ट आयोजना हुनेछ । कोशी प्रदेश क्रिकेट एसोसिएसनको सहकार्यमा उक्त ट्यालेन्ट हन्ट आयोजना हुन लागेको हो ।
विराटनगर किंग्सको मार्की खेलाडी सन्दीप लामिछाने रहेका छन् । कोशीको शान हाम्रो पहिचान भन्ने नारा सहित टिम कोशीका उदयमान खेलाडीहरूको खोजीमा निस्कन लागेको हो ।
