सुनसरी । २५ औं संस्करणको अन्तर्राष्टिय आमन्त्रण बुढासुब्बा गोल्डकप फुटबल प्रतियोगिताको दोस्रो सेमिफाइनलमा आज साविक विजेता न्युरोड टिम एनआरटी र युनाईटेड खर्साङ क्लब युकेएफसीबीच प्रतिस्पर्धा हुँदैछ ।
क्वाटरफाइनल खेलमा आयोजक धरान फुटबल क्लबलाई पराजित गरेको युकेएफसी र काँकडभिट्टा फुटबल टेनिङ सेन्टरलाई पाखा लगाउँदै सेमिफाइनल खेल्न लागेको एनआरटीबीचको खेल दिउँसो तीन बजे सुरु हुनेछ ।
धरान रंगशालामा हुने खेलमा जीत हात पार्दै एनआरटी लगातार दोस्रो पटक उपाधि जित्ने दाउमा हुनेछ । उपाधिको स्वाद चाख्न नपाएको युकेएफसी पनि पहिलो पटक फाइनल प्रवेशको दाउमा रहेको छ ।
आजको विजेताले उपाधिका लागि शनिबार चर्च ब्वाइज युनाइटेडसँग प्रतिष्पर्धा गर्नेछ । चर्च ब्वाइज पहिलो सेमिफाइनलमा भुटानको आरटीसी फुटबल क्लबलाई पराजित गर्दै उपाधि नजिक पुगिसकेको छ । गोल्डकपको विजेताले १० लाख रुपैयाँ तथा उपविजेताले पाँच लाख रुपैयाँ पुरस्कार प्राप्त गर्नेछन् ।
