सुनसरी — फागुन ५ देखि हुने दोस्रो कोशी प्रिमियर लिग ट्वान्टी–२० क्रिकेट प्रतियोगिताको ट्रफी सार्वजनिक गरिएको छ । भोक्राहा नरसिंह गाउापालिकाको डा. खालिल आजाद मैदानमा फागुन १७ सम्म चल्ने प्रतियोगिता खेल्ने ७ टिमको पनि टुंगो लागेको छ ।
सिंगल राउन्ड रोबिन आधारमा हुने प्रतियोगिताको ट्रफी बुधबार कोशी ब्यारेज किनारमा कोशी प्रदेशका सामाजिक विकासमन्त्री पाँचकर्ण राई, वन वातावरण तथा पर्यटनमन्त्री सदानन्द मण्डल र भोक्राह नरसिंह गाउँपालिकाका अध्यक्ष अजमल अख्तर आजादले सार्वजनिक गरे ।
नेपाल क्रिकेट संघ (क्यान) को स्वीकृति र सुनसरी जिल्ला क्रिकेट संघको प्राविधिक सहयोगमा कोसी प्रिमियर लिग इभेन्ट्स म्यानेजमेन्टले प्रतियोगिता आयोजना गर्न लागेको हो । गत संस्करणमा विजेताले ५ लाख र उपविजेताले ३ लाख पुरस्कार पाएको थियो । यो पटकको पुरस्कार राशीबारे केही दिनमा सार्वजनिक गरिने सुनसरी जिल्ला क्रिकेट संघका सचिव गोविन्द पौडेलले बताए ।
प्रतियोगितामा पूर्वेली सुपर किंग्स विराटनगर, नमुना ब्लास्टर इटहरी, दुहबी क्यापिटल्स, बालनबिउल सप्तरी टाइगर्स, एनबीएससी लायन्य विराटनगर, इटहरी आदर्श जायन्ट्स र भोक्राह नरसिंह अर्नाज गरी सात टिमले प्रतिस्पर्धा गर्नेछन् । सातवटै टिममा राष्ट्रिय खेलाडीको बाहुल्य हुनेछ ।
