सुनसरी — सुनसरीमा फागुन ५ देखि हुने दोस्रो कोशी प्रिमियर लिग क्रिकेटको तयारी पूरा भएको छ । भोक्राहा नरसिंह गाउँपालिकाको खालिल आजाद मैदानमा फागुन १७ सम्म चल्ने प्रतियोगिताको सबै तयारी पूरा भएको आयोजकले शुक्रबार पत्रकार सम्मेलनमा जानकारी गरायो ।
सिंगल राउन्ड रोबिन आधारमा हुने प्रतियोगितामा सात टिमले प्रतिस्पर्धा गर्नेछन् । नेपाल क्रिकेट संघको स्वीकृति र सुनसरी जिल्ला क्रिकेट संघको प्राविधिक सहयोगमा कोसी प्रिमियर लिग इभेन्ट्स म्यानेजमेन्टको आयोजनामा हुने प्रतियोगिता विजेताले ५ लाख ५ हजार र उपविजेताले ३ लाख ३ हजार रुपैयाँ पुरस्कार पाउने संयोजक सुनसरी जिल्ला क्रिकेट संघका सचिव गोविन्द पौडेलले बताए । सर्वोत्कृष्ट खेलाडीले २५ हजार पाउँदा हरेक प्लेयर अफ द म्याचले ५ हजार पाउनेछन् । बेस्ट बलर र ब्याटरले समान १५ हजार रुपैयाँ पाउनेछन् ।
पूर्वेली सुपर किंग्समा ललित राजबंशी, सन्दीप जोरा र अर्जुन साउदलगायतका खेलाडी समावेश छन् । नमुना ब्लास्टरमा कुशल भुर्तेल, कुशल मल्ल, नन्दन यादव छन् । दुहबी क्यापिटल्समा लोकेश बम, विनोद भण्डारी, विवेक यादव, शाहब आलम र बसिर अहमद छन् । सप्तरी टाइगर्समा मयन यादव, रुपेश सिंह, शुभ कंसाकार, नरेन साउद र विपिन खत्री छन् ।
एनबीएससी लायन्यमा दिलीप नाथ, कृतिक कामत र नीरज मुखिया छन् । इटहरी आदर्श जायन्ट्समा गुलसन झा, आसिफ शेख, भीम सार्की, दीपेश कँडेल र रिजन कँडेल छन् । भोक्राहा नरसिंह अर्नाजबाट अंकित सुवेदी, सुजन थपलिया, भुवन कार्की र हेमन्त धामीले खेल्नेछन् । कुल २२ खेल हुनेछ । शीर्ष दुई टोली उपाधिका लागि प्रतिस्पर्धा गर्नेछन् ।
