सुनसरी । युनाइटेड खर्साङ फुटबल क्लब (यूकेएफसी)लाई पराजित गर्दै मछिन्द्र फुटबल क्लब १५ औँ अन्तराष्ट्रिय आमन्त्रण कन्ट्रोल इटहरी गोल्डकप फुटबल प्रतियोगिताको उपाधी नजिक पुगेको छ ।
बुधबार भएको पहिलो सेमिफाइनल खेलमा युनाइटेड खर्साङ फुटबल क्लब (यूकेएफसी)लाई ३ —१ गोल अन्तरले पराजित गर्दै मछिन्द्र फाइनल प्रवेश गरेको हो ।
आज भएको खेलमा पहिलो हाफ सम्म दुवै टिमले गोल गर्न सकेनन् । दोस्रो हाफमा गोलका लागि दुवै टिम आक्रमक बनेका थिए । खेलको ६५ औँ मिनेटमा युनाइटेड खर्साङ फुटबल क्लब (यूकेएफसी)का खेलाडी हेमराज भुजेलले गोल गर्दै टिमलाई अग्रता दिलाए ।
एक गोलले पछि परेको मछिन्द्रले त्यसको ५ मिनेट पछि अर्थात ७० औँ मिनेटमा पेनाल्टी मार्फत गोल गर्दै टिमलाई बराबरीमा पुर्यायो । यूकेएफसीका खेलाडीले फल गरेपछि पाएको पेनाल्टीलाई सदुपयोग गर्दै मछिन्द्रका विदेशी खेलाडी ओमोलाजा नुरेन हरिमले गोल गर्दै टिमलाई बराबरीमा पुर्याए ।
खेलको ७२ औँ मिनेटमा मछिन्द्रका विदेशी खेलाडी मल्लिक बि युसुफले गोल गर्दै टिमलाई अग्रता दिलाए । मल्लिकले वान भर्सेस वानको स्थितीमा आकर्षक गोल गर्दैै टिमको अग्रता बढाए ।
१ गोलले पछि परेको यूकेएफसीले गोल गर्ने निकै प्रयास गरे पनि सफल हुन सकेन । अन्तिम समयमा खेल निकै रोमाञ्चक बनेको थियो । गोलका लागि दुवै टिमले गोल पोष्टमा गरेको प्रहार सफल हुन सकेन ।
निर्धारित समय पछि थपिएको अतिरिक्त ४ मिनेटको समयलाई सदुपयोग गर्दै मछिन्द्रले गोल अन्तर बढायो । थपिएको अतिरिक्त समयको तेस्रो मिनेटमा मल्लिक बि युसुफले व्यक्तिगत दोस्रो गोल गर्दै जितको अन्तर फराकिलो बनाए ।
फाइनल प्रवेश गरेको मछिन्द्रले भोली हुने दोस्रो सेमिफाइनलको विजेतासँग शनिबार फाइनल खेल खेल्ने छ ।
भोली(विहिबार)को दोस्रो सेमिफाइनल खेल २ पटकको विजेता सगरमाथा युथ क्लब मोरङ र धरान फुटबल क्लब सुनसरी बीच हुने आयोजक राष्ट्रिय जागृति क्लबले जनाएको छ ।
प्रतियोगिताको विजेताले नगद १० लाख र उपविजेताले ५लाख प्राप्त गर्ने आयोजक राष्ट्रिय जागृती क्लबका प्रतियोगिता संयोजक अनुरोध थापाले जानकारी दिए ।
