सुनसरी । १५ औँ अन्तराष्ट्रिय आमन्त्रण कन्ट्रोल इटहरी गोल्डकप फुटबल प्रतियोगिताको उपाधीका लागि फाइनल खेल शनिबार हुँदैछ । उपाधीका लागि सगरमाथा युथ क्लब मोरङ र मछिन्द्र फुटबल क्लब काठमाण्डौ प्रतिस्पर्धा गर्दैछन् ।
शुक्रबार भएको प्रि–म्याच कन्फ्रेन्समा दुवै टिमका प्रशिक्षक तथा टिम कप्तानहरुले खेल आफुले जित्ने दावी गरे ।
यस अघि दुई २ पटक प्रतियोगिताको उपाधी जितिसकेको सगरमाथा युथ क्लबका कप्तान अशोक खवासले यस पटक पनि उपाधी जित्ने दावी गरे ।
उनले भने, ‘ यो हाम्रो होमग्राउण्ड पनि हो, यस अगाडी दुई पटक हामीले जितेको छौँ, यस पटक पनि जित्नेमा हामी विश्वस्त छौँ ’
‘हामीलाई लोकल दर्शकको सर्पोटले उत्साह थप्ने हुँदा उच्च मनोबलका साथ ग्राउण्डमा खेल प्रर्दशन गछौँ ’ कप्तान खवासले बताए ।
सगरमाथाका प्रशिक्षक युवेन गुरुङ पनि उपाधी जित्नेमा ढुक्क देखिए । मछिन्द्र क्लब लगातार प्रतियोगिता खेल्दा खेलाडीहरु थकित भएको हुँदा त्यसको फाइदा उठाउने रणनितिमा रहेन प्रशिक्षक गुरुङले बताए ।
‘ इटहरी गोल्डकप हाम्रो लागि घरेलु प्रतियोगिता हो, आफ्नै मैदान र दर्शकको हौसलाले हामीलाई सर्पोट हुन्छ ’ प्रशिक्षक गुरुङको भनाई छ ।
यता, पहिलो पटक प्रतियोगितामा सहभागिता जनाएको मछिन्द्र फुटबल क्लब फाइनल जित्दै इतिहास रच्ने दाउमा छ ।
विपक्षी टिम राम्रो भएपनि उपाधी भने आफुहरुले जित्ने मछिन्द्रका कप्तान गोलकिपर विशाल श्रेष्ठ बताउँछन् ।
‘उहाँहरुको टिम राम्रो छ, खेलाडीले राम्रो खेलेका छन् । यस अघि २ पटक जितिसकेको छ । तर हामीले उहाँहरुको २ वटा खेल हेरेका छौँ । उहाँहरुको रणनीति अनुसार खेल्दै प्रतियोगिता जित्नेमा ढुक्कछौँ ।’ मछिन्द्रका कप्तान श्रेष्ठले भने ।
त्यस्तै मछिन्द्रका टिम म्यानेजर शिरिस श्रेष्ठले पहिलो सहभागितामै फाइनलमा पुगेको र उपाधी जित्नेमा विश्वस्त रहेको बताए । म्यानेजर श्रेष्ठले पनि सगरमाथाका खेलाडीले राम्रो खेलेको तर फाइनलमा उपाधी भने आफुहरुले नै जित्ने दावी गरे ।
मोफसलका प्रतियोगिताहरुमा लगातार सहभागिता जनाउँदा खेलाडीहरु केही दबावमा हुने उनले स्वीकार गरे । तर दुई टिम रहेका कारण त्यसलाई व्यवस्थापन गरिएको उनको स्पष्ट पारे ।
सगरमाथा युथ क्लवले क्वाटरफाइनलमा न्यूरोड टिम(एनआरटि) र सेमिफाइनलमा धरान फुटबल क्लबलाई पराजित गर्दै फाइनल प्रवेश गरेको हो । यस्तै मछिन्द्र फुटबल क्लबले क्वाटरफाइनलमा झापा फुटबल क्लव र सेमिफाइनलमा युनाइटेड खर्साङ फुटबल क्लब (यूकेएफसी) भारतलाई पराजित गर्दै फाइनल प्रवेश गरेको हो ।
२ पटकको उपाधी विजेता सगरमाथा युथ क्बल उच्च मनोबलका साथ मैदानमा उत्रने देखिएको छ । सगरमाथा यस पटक पनि फाइनल जित्दै तेस्रो पटक उपाधी हत्याउने दाउमा छ । मछिन्द्र क्लब पनि पहिलो पटक फाइनल खेल खेल्दै उपाधी जितेर इतिहास बनाउने रणनितिमा छ । इतिहास रच्न खेल जित्नै पर्ने हुँदा दुवै टिम बीचको खेल निकै प्रतिस्पर्धात्मक हुने अपेक्षा गर्न सकिन्छ ।
प्रतियोगिताको विजेताले नगद १० लाख र उपविजेताले ५लाख प्राप्त गर्नेछ । शनिबार हुने फाइनल खेल इटहरी रंगशालामा दिउँसो ३ बजे बाट सुरु हुने आयोजक राष्ट्रिय जागृती क्लबले जनाएको छ ।
