सुनसरी । कोसी प्रिमियर लिग क्रिकेट प्रतियोगितामा दुहबी क्यापिटल्सले लगातार तेस्रो हार ब्योहोरेको छ । सुनसरीको भोक्राहास्थित डाक्टर खालिल आजाद क्रिकेट मैदानमा शुक्रवार सम्पन्न पहिलो खेलमा भोक्राहा नरसिंह अर्नाजले दुहबीलाई ६१ रनले पराजित गरेको छ । भोक्राहा अर्नाजले प्रस्तुत गरेको १ सय ३० रनको लक्ष्य पछ्याएको दुहबी १६ दशमलव ४ बलमा ६९ रनमा समेटियो । दुहबीका लागि विवेक यादवले सर्वाधिक २५ रन र शाहाब आलमले ११ रन बनाउनु बाहेक अन्य ब्याटरले दोहोरो अङ्कमा रन जोड्न सकेनन् । उसका आश गरिएका खेलाडी विनोद भण्डारी र लोकेश बम चल्न सकेनन् ।
बलिङतर्फ भोक्राहाका रोहन शाहले ४, भुवन कार्कीले ३ र हेमन्त धामीले २ विकेट हात पारे । यसअघि टस हारेर पहिले ब्याटिङ गरेको भोक्राहाले १९. ३ ओभरमा १३० रन जोडेर सबै विकेट गुमाएको थियो । उसको लागि किरण ठगुन्नाले सर्वाधिक २७ रन बनाए । भुवन कार्कीले १९ रनमा अविजित रहे । सन्दीप ढुंगानाले १६, कप्तान अंकित सुबेदीले १४ रनको योगदान गरे । दुहबीको बलिङमा साहब आलमले ३ विकेट लिँदा लोकेश बम, विवेक यादव र कप्तान सितोष शाहले समान २ विकेट लिए ।
शुक्रबारनै भएको दोस्रो खेलमा इटहरी आदर्श जायन्ट्सले पहिलो हार ब्योहोरेको छ । यसअघिका दुई खेलमा लगातार जीत निकालेको इटहरी आदर्शमाथि नमुना ब्लास्टर्सले १ रनको रोमाञ्चक जीत हात पार्यो । तीन खेल खेलेको नमुनाको यो दोस्रो जीत हो । १५६ रनको लक्ष्य पछ्याएको इटहरी आदर्शले निर्धारित २० ओभरमा सबै विकेट गुमाएर १५४ रन मात्र बनाउन सक्यो । अन्तिम बलमा जितको लागि केवल २ रन मात्र आवश्यक हुँदा कुशल भुर्तेलले कप्तान भूपाल लुइँटेललाई क्याच आउटको सिकार पार्दै नमुनालाई जिताएका थिए । अन्तिम ओभरमा जितको लागि ५ रन आवश्यक हुँदा इटहरी आदर्शको २ विकेट बाँकी थियो । भुर्तेलले गरेको अन्तिम ओभरको पहिलो २ बलमा ३ रन आएपछि खेलले रोमाञ्चक बन्यो । तेस्रो बलमा भुर्तेलले ३१ रन बनाएर खेलिरहेका दिपेश कँडेललाई क्याच आउट पारेपछि क्रिजमा रहेका भूपालले लगातार २ बलमा रन बनाउन नसकेपछि इटहरी आदर्श पराजित बन्न पुग्यो ।
इटहरी आदर्शको लागि दिपेश कँडेल र फिर्दोश अन्सारीले समान ३१ रन बनाउँदा आसिफ शेखले २४, भीम सार्कीले २३ तथा मिनास थापाले २२ रन बनाए नमुनाका बलर प्रकाश कार्कीले सर्वाधिक ४ विकेट लिए । नन्दन यादव र कुशल भुर्तेलले समान २ विकेट लिए । यस अघि टस जितेर ब्याटिङ गरेको नमुनाले २० ओभरमा ६ विकेट गुमाएर १५५ रन बनाएको थियो । उसको लागि ओपनर कुशल भुर्तेलले सर्वाधिक ५९ रन बनाए । ३८ बलको सामाना गरेका उनले ७ चौका र ३ छक्का प्रहार गरे । कुशल मल्लले ४४ रन बनाउँदा इशान पाण्डेले २७ रन जोडे । बलिङ तर्फ इटहरी आदर्शका गुल्सन झाले ३ विकेट लिँदा विपिन खत्री, भूपाल लुइँटेल र फिर्दोश अन्सारीले १/१ विकेट लिए ।
