सुनसरी– कोशी प्रिमियर लिग प्रतियोगिता अन्तर्गत शनिबार सम्पन्न खेलमा बलान बिहुल सप्तरी टाइगर र नामुना ब्लास्टर विजयी हुदै शिर्ष स्थानमा उक्लिएका छन् । प्रतियोगिता अन्तर्गतको छैठौ दिनको पहिलो खेलमा बलान बिहुल सप्तरी टाइगरले पुर्बेली सुपर किंग्स बिराटनगरलाई १ विकेटले पराजित गरेको छ । सुनसरीको भोक्राहा स्थित डाक्टर खालिल आजाद क्रिकेट मैदानमा १४३ रनको लक्ष्य सप्तरीले अन्तिम बलमा ९ विकेट गुमाएर भेटायो । 

अन्तिम बलमा जितका लागि २ रन आवस्यक भएको बेला रामनरेश गिरिले चौका प्रहार गर्दै खेल जित दिलाए । ११ बल खेलेका गिरीले २ चौका र १ छक्का मद्दतले अविजित २१ रन बनाए । नरेन साउदले सर्वाधिक ३७ रन बनाउदा बिशाल सुशलिंगले २४ रन योगदान दिए । बलिङतर्फ पुर्बेली किंग्सका  बलिंगमा दिनेश अधिकारीले ४ विकेट लिंदा ललित राजबंशी र मुकुन्द यादवले २/२ विकेट लिए । दुई मेडन ओभर बलिङ गरेका ललितले सुरुवाती पहिलो ओभरको पहिलो बलमै बिकेट लिएका थिए । अर्को मेडन ओभरमा पनि उनले बिकेट लिएपनि टिमलाई जीताउन सकेनन । 

यसअघि टस हारेर ब्याटिंग गरेको पुर्बेली सुपर किंग्सले २० ओभरमा ६ विकेट क्षतीमा १४२ रन बनाएको थियो । उसकालागि दिवान पुनले सर्वाधिक ३२, अर्जुन साउदले २५, इमरान शेखले २१ तथा सुमन गहतराजले १६ रन योगदान दिए । सप्तरी टाइगरको बलिंगमा नरेन साउदले २ विकेट लिंए । रामनरेश गिरि, बिशाल पटेल, अभिशेष गौतम र रुपेश सिंहले १/१ विकेट लिए । 

     शनिबारनै सम्पन्न दोश्रो खेलमा नमुना ब्लास्टर्सले एनबिएससी लायन्स बिराटनगरमाथी ९ विकेटको जीत हात पारेको छ । नमुनाको जितमा कुशल भुर्तेलले सर्वाधिक २४ रन बनाए । १४ बलको सामना गरेका उनले ३ चौका र २ छक्का प्रहार गर्दै दर्शकलाई मनोरञ्जन दिए । इशान पाण्डेले अविजित रहँदै १० बलमा ३ चौका र १ छक्का मद्दतले २१ रन बनाए । यसअघि एनबिएससीले टस जितेर ब्याटिंग गर्दै १९ ओभरमा केवल ५९ रन मात्र बनाउन सकेको थियो । अघिल्लो खेलमा पूर्बेली किंग्ससंग २६ रनमा अलआउट भएको एनबिएससीको लागि ओपनर पप्पु यादवले सर्वाधिक २३ रन बनाए ।

बलिंगतर्फ नमुनाका कुशल भुर्तेल र कुशल मल्लले समान ४ विकेट लिए । भुर्तेलले ३ ओभरमा १ मेडन ओभर गर्दै मात्र ६ रन खर्चिए । मल्लले ४ ओभरमा मात्र ९ रन खर्चिएका थिए । प्रकाश कार्की र कप्तान गौरभ कटवालले १/१ विकेट लिए ।

यो जीतसंगै चार खेल खेलको नमुना जारी प्रतियोगितामा ६ अंकका साथ शिर्ष स्थानमा उक्लिएको छ । यस्तै चार खेल खेलेर ६ अंक बनाएको सप्तरी रनरेटको आधारमा दोस्रो स्थानमा छ । ४ अंकको साथ भोक्राहा नरसिंह अर्नाज र इटहरी आदर्श जाइन्ट्स क्रमश तेस्रो र चौथो स्थानमा छन ।

प्रतियोगिताभर कुल २२ खेल हुनेटछन । शिर्ष दुई स्थानमा रहने टिमले उपाधीका लागि प्रतिष्पर्धा गर्नेछन ।

बिजेताले ५ लाख र उपबिजेताले ३ लाख पाउने छन ।