सुनसरी– कोसी प्रिमियर लिग क्रिकेट प्रतियोगिता अन्तर्गत आइतबार सम्पन्न खेलमा भोक्राहा नरसिंह अर्नाज र बलान बिहुल सप्तरी टाइगर विजयी हुँदै शीर्ष दुईमा उक्लिएका छन् । प्रतियोगिता अन्तर्गत आइतबार भएका पहिलो खेलमा भोक्राहाले इटहरी आदर्श जाइन्ट्सलाई ४ विकेटले पराजित गरेको छ । सुनसरीको भोक्राहा स्थित डाक्टर खालिल आजाद क्रिकेट मैदानमा टस हारेर पहिले ब्याटिङ गरेको इटहरीले निर्धारित २० ओभरमा ९ विकेट गुमाउँदै १ सय २९ रन रन बनाएको थियो । जवाफमा १ सय ३० रनको विजयी लक्ष्य भोक्राहाले १९ दशमलव ३ बलमा ६ विकेट गुमाएर पुरा गर्यो ।
दोस्रो खेलमा सप्तरी टाइगरले दुहबी क्यापिटल्सलाई ४० रनले पराजित गरेको छ । टस जितेर पहिला ब्याटिङ गरेको सप्तरीले सात विकेटको क्षतिमा १ सय ७० रनको योगफल खडा गरेको थियो । जवाफमा १ सय ७१ रनको विजयी लक्ष्य पछ्याएको दुहबी ८ विकेट गुमाउँदै १ सय २५ रन मात्र बनाउन सक्यो ।
यो जितसँगै चार खेलमा सत प्रतिशत जीत निकाल्दै सप्तरी शीर्ष स्थानमा उक्लिएको छ भने लगातार चार खेल हारेको दुहबी प्रतियोगिताको उपाधि होडबाट बाहिरिएको छ । अब उसले दुई खेल मात्र खेल्न बाँकी छ । यस्तै चार खेलमा तीनमा जीत र एकमा हार ब्योहोरेर समान ६ अंक बनाएको नमुना ब्लास्टर र भोक्राहा नरसिंह अर्नाज क्रमशः दोस्रो र तेस्रो स्थानमा छन् । इटहरी आदर्श जाइन्ट्स चौथो स्थानमा छ । प्रतियोगिताभर कुल २२ खेल हुनेछन् । शीर्ष दुई स्थानमा रहने टिमले उपाधिका लागि प्रतिस्पर्धा गर्नेछन । विजेताले ५ लाख र उपविजेताले ३ लाख पाउने छन् ।
