सुनसरी– रेड स्टार कलेज मोरङले प्रथम हिसान कोसी फुटबल च्याम्पियनसिपमा विजयी सुरुवात गरेको छ ।
उच्च शिक्षालय तथा माध्यमिक विद्यालय संघ हिसान सुनसरीको आयोजनामा इटहरी रङ्गशालामा सुरु प्रतियोगिताको उद्घाटन खेलमा रेड स्टारले सुनसरीको सुष्मा गोदावरी कलेजलाई २–० ले पराजित गरेको हो ।
मंगलबारनै सम्पन्न दोस्रो खेलमा निधि सेकेण्डरी स्कुल बिर्तामोड झापाले विराटनगरको कान्तिपुर कलेजलाई ३–० गोल अन्तरले पराजित गरेको छ ।
मङ्गलवारको खेलमा विजयी भएका यी दुवै टोली सेमिफाइनल प्रवेश गरेका छन् ।
बुधवार हुने पहिलो सेमिफाइनल खेलमा निधी सेकेण्डरी र पूर्वाञ्चल कलेजबिच प्रतिस्पर्धा हुनेछ ।
दोस्रो सेमिफाइनलमा रेड स्टार र आदर्श स्कुल अफ म्यानेजमेन्ट बिर्तामोड झापाबिच खेल हुनेछ ।
पूर्वाञ्चल र आदर्श सिधै बाई पाएर सेमिफाइनल प्रवेश गरेका हुन ।
हिसानको जिल्ला स्तरीय प्रतियोगितामा विजेता तथा उपविजेता बनेको तीन जिल्लाका जम्मा ६ वटा शिक्षालय सहभागी प्रतियोगिताको फाइनल खेल बिहीबार हुने हिसान सुनसरी अध्यक्ष सागर भटराईले जानकारी दिए ।
प्रतियोगिताको हिसान कोसी प्रदेश अध्यक्ष भेषराज पोखरेलले उद्घाटन गरेका थिए ।
