सुनसरी — कोशी प्रिमियर लिग क्रिकेट प्रतियोगिताअन्तर्गत बलान बिहुल सप्तरी टाइगरको अपराजित यात्रामा ब्रेक लागेको छ । मंगलबार सम्पन्न पहिलो खेलमा सप्तरीको अपराजित यात्रामा इटहरी आदर्श जाइन्ट्स बाधक बन्यो । यसअघिका चारवटै खेलमा शतप्रतिशत जित निकालेको सप्तरी टाइगर इटहरी आदर्शसँग ३२ रनले पराजित भएपछि एक खेलअघि नै उपाधि होडमा पुग्नबाट चुकेको छ ।
सुनसरीको भोक्राहास्थित डाक्टर खलिल आजाद क्रिकेट मैदानमा टस हारेर पहिले ब्याटिङ गरेको इटहरी आदर्शले निर्धारित २० ओभरमा ८ विकेट गुमाउँदै १ सय २७ रन बनाएको थियो । इटहरीका लागि अर्जुन घर्तीले ५३ रनको उत्कृष्ट पारी खेले । ३८ बलको सामना गरेका उनले ४ छक्का र २ चौका प्रहार गर्दै ५३ रन बनाएका थिए । ३ हृयाट्रिक छक्का र १ चौका प्रहार गर्दै दीपेश कँडेलले ३३ रन बनाए ।
भीम सार्कीले १४ रन बनाउँदा आसिफ शेखले खाता खोल्न सकेनन । सप्तरीका नरेन साउदले ३ विकेट लिए । रुपेश सिंह र विशाल पटेलले २–२ विकेट लिए । चार ओभर बलिङ गरेर केवल ९ रन खर्चिएका विशाल सुसलिङले १ विकेट हात पारे ।
जवाफमा १ सय २८ रनको विजयी लक्ष्य पछ्याएको सप्तरीले १८ दशमलव ४ बलमा सबै विकेट गुमाएर ९५ रन मात्र बनाउन सक्यो । सप्तरीका लागि रोहन बिकेले सर्वाधिक २७ रन बनाउदा शंकर राणाले २०, अभिषेक कार्कीले १७ र विशाल पटेलले १४ रन मात्र बनाउन सके । बलिङतर्फ इटहरी आदर्शका दीपेश कँडेलले ४ र फिर्दोस अन्सारीले ३ विकेट लिए । अलराउन्डर प्रदर्शन गरेका कँडेल प्लेयर अफ द म्याच घोषित हुँदै नगद ५ हजार पाए ।
मंगलबार नै सम्पन्न दोस्रो खेलमा पुर्बेली सुपर किंगले दुहबी क्यापिटलमाथि १० विकेटको फराकिलो जित हात पारेको छ । प्रतियोगिताको उपाधि होडबाट बाहिरिसकेको दुहबीको यो लगातार पाँचौ हार हो ।
टस जितेर पहिला ब्याटिङ गरेको दुहबी १८ दशमलव ५ बल खेल्दै १ सय १२ रनमा अलआउट भएको थियो । दुहबीका लागि सोनु मण्डलले ३४, विनोद भण्डारीले ३२ र लोकेश बमले १७ रन बनाउनुबाहेक अन्य ब्याटरले सन्तोषजनक प्रदर्शन गर्न सकेनन् । पुर्बेलीका दिनेश अधिकारीले ४ विकेट लिँदा सौगात भट्टराई र इमरान शेखले २–२ विकेट लिए ।
जवाफमा १ सय १३ रनको विजयी लक्ष्य पछ्याएको पुर्बेलीले इमरान शेखले अविजित ७९ र अर्जुन साउदको २९ रनको मद्दतले ९ दशमलव २ बलमा सहजै पूरा गर्यो । खेलको प्लेयर अफद म्याच इमरान शेख घोषित भए ।
