सुनसरी — नमुना ब्लास्टर सुनसरीको भोक्राहामा जारी कोशी प्रिमियर लिग क्रिकेट प्रतियोगिताको फाइनल प्रवेश गरेको छ । बुधबार सम्पन्न लिग चरणको आफ्नो अन्तिम खेलमा नमुनाले बलान बिहुल सप्तरी टाइगरलाई ४१ रनले पराजित गर्दै फाइनलमा पुग्ने पहिलो टोली बनेको हो ।
सिंगल राउण्ड रोबिनमा भइरहेको खेलमा नमुनाले ६ खेलमा ४ जित, १ बराबरी र एकमा हार बेहोर्दै ९ अंक सहित शीर्षस्थानमा रहँदै उपाधि नजिक पुगेको हो । सप्तरी टाइगर भने प्रतियोगिताबाट बाहिरिएको छ ।
भोक्राहास्थित डाक्टर खलिल आजाद क्रिकेट मैदानमा सम्पन्न खेलमा टस जितेर पहिले ब्याटिङ गरेको नमुना ब्लास्टरले निर्धारित २० ओभरमा ६ विकेट गुमाएर १६३ रनको योगफल बनाएको थियो । नमुनाको लागि मनिष थापाले सर्वाधिक ५१ रन बनाए अभिजित पारी खेले । २९ बलको सामना गरेका उनले २ चौका र ४ छक्का प्रहार गरे । दिपक डुम्रेले ३८ रन बनाए । आजको खेल जित्नै पर्ने दबाबमा रहेको नमुनाले दिपेन्द्र सिंह ऐरीलाई सुनसरी फिकाएको थियो । पहिलो खेल खेलेका ऐरीले १८ रन बनाए आउट भए । केबल ८ बल खेलेका उनले ३ चौका र १ छक्का प्रहार गरे । कुशल भुर्तेलले १७, रुपक बरालले अविजित १६ र कुशल मल्लले १४ रन बनाए । सप्तरी टाइगरको बलिङमा रुपेश सिंह र अभिषेश गौतमले समान २ तथा विशाल पटेल र विशाल सुस्लिङले १/१ विकेट लिए ।
जवाफमा १६४ रनको लक्ष्य पछ्याएको बलान बिहुल सप्तरी टाइगरले १९.३ बलमा १२२ रनमा समेटियो । उसका लागि रुपेश सिंहले आक्रामक ब्याटिङ गर्दै अर्धशतकीय इनिङ खेले । उनले २८ बलमा ५ चौका र ४ छक्काको मद्दतले ५३ रन बनाए । यस्तै, अमित श्रेष्ठले २९ रन बनाउँदा अन्य ब्याटरले दोहोरो अंकमा रन बनाउन सकेनन् । नमुनाको बलिङमा कुशल मल्लले ४ विकेट लिए । मल्लले ४ ओभरमा २ मेडन ओभर गर्दै ३ रन मात्र खर्चिए । प्रकाश कार्कीले ३ विकेट लिए भने दुर्गेश गुप्ता र दिपेन्द्र सिंह ऐरीले १/१ विकेट लिए ।
यसअघि बुधबारै सम्पन्न पहिलो खेलमा इटहरी आदर्श जायन्ट्सले एनबिएससी लायन्स विराटनगरलाई ५ विकेटले पराजित गरेको छ । एनबीएससी लायनले दिएको १०८ रनको लक्ष्य इटहरी आदर्शले ९ दशमलव २ बलमा भेटायो । इटहरी आदर्शको जीतमा भीम सार्कीले सर्वाधिक ५२ रन अभिजित योगदान दिए । सार्कीले २१ बलमा ८ चौका र २ छक्का प्रहार गर्दै अर्धशतकीय इनिङ खेले ।
आसिफ शेखले ११ बलमा ३ चौका र १ छक्का मद्दतमा २३ रन बनाए । इटहरी आदर्शका दिपेश कँडेल र भूपाल लुइँटेल समान २ विकेट लिए । विपिन खत्री, गुल्सन झा र फिर्दोश अन्सारीले १/१ विकेट लिए । आजको जीतसँगै इटहरी आदर्शले फाइनल प्रवेशका लागि बिहीबार हुने भोक्राहा नरसिंह अर्नाज र पूर्वेली सुपरकिङबीचको खेलको नतिजामा भर पर्नुपर्ने हुन्छ । उक्त खेलमा भोक्राहा नरसिंह पराजय भएको खण्डमा मात्र इटहरी आदर्शको फाइनल भीडन्त पक्का हुन्छ । भोक्राहा नरसिंह विजयी भए नमुना ब्लास्टर र भोक्राहाको उपाधि भिडन्त हुनेछ ।
