विराटनगर । प्रदेशस्तरीय पुरुष कबड्डी प्रतियोगिताको उपाधि मोरङ जिल्ला टोलीले हात पारेको छ । विराटनगर स्थित दिल्ली पब्लिक स्कुलको मैदानमा झापा जिल्लालाई पराजित गर्दै मोरङले उपाधि हात पारेको हो ।
मोरङले झापाको २० अङ्क विरुद्ध ३१ अङ्क हासिल गर्दै प्रतियोगिताको उपाधि आफ्नो पक्षमा पारेको हो। कोसी प्रदेशका १३ टिमको सहभागिता रहेको प्रतियोगितामा मोरङले उपाधि सँगै ट्रफी , मेडल र १ लाख नगद पुरस्कार प्राप्त गरेको छ भने झापाले उपविजेताको ट्रफी , मेडल र ५० हजार नगद पुरस्कारमा चित्त बुझाएको छ।
फुटबलमा चार खेल
कोसी प्रदेश खेलकुद विकास बोर्डको आयोजनामा जारी प्रथम कोसी प्रदेश खेलकुद महोत्सव- २०८१ को दोस्रो दिनमा प्रदेशस्तरीय महिला फुटबलका चार खेल भएको छ । झापा , मोरङ , सुनसरी र धनकुटा विजयी भएको छ।
प्रथम कोसी खेलकुद महोत्सव २०८१ अन्तर्गतको प्रदेशस्तरीय महिला फुटबल प्रतियोगितामा झापा , मोरङ ,सुनसरी र धनकुटाको जिल्ला टोली विजयी भएको छ। दिल्ली पब्लिक स्कुलको मैदानमा सम्पन्न प्रथम खेलमा तेह्रथुम जिल्ला टोलीलाई ०-६ गोल गर्दै झापा विजयी भएको हो।
झापाको जितमा जेनिफर मगरले २ , सिम्रन राई , मंजिला योङ्गहाङ्ग , रेणु लिम्बू र खुस्मा राईले एक-एक गोल गरे ।
त्यस्तै , दोस्रो खेलमा खोटाङलाई ०-१ गोल गर्दै मोरङ विजयी भएको छ। मोरङको लागि रेसना राईले खेलको १५ औँ मिनेटमा निर्णायक गोल गरे । तेस्रो खेलमा सुनसरीले सोलुखुम्बुलाई ३-० गोलले पराजित गर्दै खेल आफ्नो पक्षमा पारेको थियो। सुनसरीको लागि जुनु लिम्बूले २ र सुमित्रा राईले १ गोल गरे।
चौथो खेलमा ओखलढुङ्गा विरुद्ध अन्तिम समयमा गोल गर्दै धनकुटाले खेल आफ्नो पक्षमा पार्याे। धनकुटाका लागि खेलको अन्तिम समयमा ' वुमन अफ द म्याच ' अनिशा राईले गोल गर्दै धनकुटालाई विजयी बनाइन् ।
कोसी प्रदेश खेलकुद विकास बोर्डका सदस्य सचिव कृष्ण बस्नेत ( पर्शुराम ) ले फागुन १३ देखि १८ गते सम्म चल्ने खेलकुद महोत्सवमा हालसम्म एथलेटिक्सका स्पर्धाहरू , डोरी तान र पुरुष कबड्डी प्रतियोगिता सम्पन्न भैसकेको जानकारी दिए।
महोत्सवमा प्रदेशस्तरीय महिला फुटबल , महिला तथा पुरुष दौड , पुरुष कबड्डी , भेट्रान बाघचाल , महिला तथा पुरुष टेबल टेनिस , महिला तथा पुरुष बुद्धिचाल , महिला तथा पुरुष कराँते , महिला तथा पुरुष तेक्वान्दो र पुरुष सफ्टटेनिस र डोरी तान लगायतको खेलकुद प्रतियोगिता समावेश छन्।
