विराटनगर । भद्रपुरमा जारी झापा गोल्ड कपको बिहीबारको सेमिफाइनल खेलमा झापा ११ फाइनलमा प्रवेश गरेको छ । दोस्रो सेमिफाइनलमा झापा ११ ले भुटानको डागा युनाइटेड एसीलाई ३–१ गोल अन्तरले पराजित गर्दै उपाधि नजिक पुगेको हो । अब फाइनलमा झापा ११ ले आयोजक भद्रपुर ब्लेजर्ससँग उपाधिका लागि प्रतिस्पर्धा गर्नेछ । झापा ११ र भद्रपुर ब्लेजर्स बिचको फाइनल खेल १६ गते हुनेछ ।
मेची रङ्गशालामा भएको खेलको निर्धारित ९० मिनेटमा १–१ गोलको बराबरी भएपछि अतिरिक्त समय थप गरिएको थियो । अतिरिक्त समयमा झापाले दुई गोल थप्दै ३–१ को जित निकालेको हो । जितको लागि झापा ११ का एरोन थापाले खेलको ५५औँ मिनेटमा गरेको फ्रि-किक गोलमा परिणत गर्दै टिमलाई अग्रता दिलाए । खेलको ८४ औँ मिनेटमा भुटानका लागि सुरज रसाइलीले उत्कृष्ट प्रहार गोलमा परिणत गरी बदला लिए । खेलको ९२ औँ मिनेटमा भुटानी गोलकिपरको गल्तीको फाइदा उठाउँदै झापाका रोहन कार्कीले टिमलाई पुनः अग्रता दिलाए । झापाका हरिबहादुर आले मगरले खेलको ९५औँ मिनेटमा समीर तामाङको क्रस पास सदुपयोग गर्दै तेस्रो गोलसँगै झापाले फाइनलमा आफ्नो यात्रा सुरक्षित गरेको थियो ।
