सुनसरी । आदर्श स्कुल अफ म्यानेजमेन्ट बिर्तामोडले प्रथम हिसान कोसी फुटबल च्याम्पियनसिपको उपाधि जितेको छ ।
उच्च शिक्षालय तथा माध्यमिक विद्यालय संघ हिसान सुनसरीको आयोजनामा भएको प्रतियोगिताको फाइनलमा आदर्शले बिर्तामोडकै निधि सेकेण्डरी स्कुललाई ४–० गोल अन्तरले पराजित गर्दै उपाधि जितेको हो ।
इटहरी रङ्गशालामा सम्पन्न फाइनल खेलमा आदर्शलाई उपाधि जिताउन रायन भटराईले ह्याट्रिक गरे । नितेश साँवा लिम्बुले १ गोल थपे । भटराई फाइनल खेलको म्यानअफद म्याच भए ।
आदर्शका प्रशान्त दुलाल उत्कृष्ट गोलकिपर, क्षितिज अधिकारी उत्कृष्ट डिफेन्डर, समीर हेमरन उत्कृष्ट फरवार्ड घोषित भए । निधि सेकण्डरीका दिवस बास्तोला प्रतियोगिताको सर्वोत्कृष्ट खेलाडी घोषित भए । विवश मगर उत्कृष्ट मिडफिल्डर भए ।
मङ्गलवारदेखि भएको प्रतियोगितामा हिसानको जिल्ला स्तरीय प्रतियोगितामा विजेता तथा उपविजेता बनेको तीन झापा, मोरङ र सुनसरी जिल्लाका जम्मा ६ वटा शिक्षालय सहभागी थिए ।
अखिल नेपाल फुटबल संघ एन्फा सुनसरीको संयोजनमा सम्पन्न खेलको विजेता तथा उपविजेता टिमहरूलाई हिसानका केन्द्रीय उपाध्यक्ष भेषराज पोखरेल, केन्द्रीय सदस्य बलराम पन्त, मुकुन्द घिमिरे, प्रदेश अध्यक्ष ज्ञानकुमार खड्का, उपाध्यक्ष गणेश दुलाल, सचिव दिपेश बास्तोला र एन्फा कोशीका सहमाहसचिव केशव कार्की र सुनसरी महासचिव कोबिदजंग कार्कीले शिल्ड र मेडल वितरण गरे ।
