सुनसरी– कोशी प्रिमियर लिग क्रिकेट प्रतियोगिताको उपाधि भिडन्त आज हुदैछ । सुनसरीको भोक्राहामा दिउसो हुने फाइनल भिडन्तमा नमुना ब्लास्टर र भोक्राहा नरसिंह अर्नाज प्रतिष्पर्धा गर्दैछन् । सहभागी सात टिममध्ये स्थानीयस्तरका खेलाडी समेटिएको भोक्राहा र स्टार खेलाडीले भरिएको नमुना ब्लास्टरबिचको उपाधि भिडन्त रोमाञ्चक हुने अनुमान गरिएको छ । कोशी प्रिमियर लिग क्रिकेटको ट्रफी सार्वजनिक गर्दा भोक्राहा नरसिंह अर्नाजलाई सबैभन्दा कमजोर टिमको ट्याग लगाइएको थियो । सहभागी सबैजसो टिममा राष्ट्रिय टिमका चर्चित खेलाडीहरु समावेश गरिएको तर भोक्राहाको टिममा स्थानीय खेलाडीको बाहुल्य रहेकाले टिमको प्रदर्शन कमजोर बन्ने धेरैको आँकलन थियो । तर युवा खेलाडीले पनि आफ्नो क्षमता प्रस्तुत गर्ने अवसार पाउँदा लिग चरणमा उत्कृष्ट पुनरागमन गर्दै आयोजक टिम फाइनल पुग्न सफल भयो । लिगमा समेत नमुनासँग विजयी भएको भोक्राहा नरसिंह फाइनल खेलमा उच्च मनोबल लिएर खेल्ने प्रशिक्षक राजकुमार प्रधान बताउँछन् । यसभन्दा अगाडी पनि सधै संगै खेलिरहने खेलाडीहरुबिच तालमेल राम्रो भएकाले उपाधी जित्नेमा ढुक्क रहेको कप्तान अंकित सुबेदीको दाबी छ ।
गुल्सन झा, आसिफ शेख, भीम सार्की, दिपेश कंडेल जस्ता खेलाडी सम्मिलित तथा उपाधिको दाबेदार मानिएको इटहरी आदर्श जाइन्ट्समाथी एक रनको रोमाञ्चक जित हात पारेको नमुना ब्लास्टर त स्टार खेलाडीहरुले भरिएको टिम हो । कुशल मल्ल, कुशल भुर्तेल जस्ता अनुभवी खेलाडी सम्मिलित टिमले उपाधि जित्नकै लागि दीपेन्द्रसिंह ऐरीलाई टिममा समावेश गरेको छ । बिनोद भण्डारी, लोकेश बम, बिबेक यादव सम्मिलित दुहबी क्यापिटल्स र उपाधिको अर्को दाबेदार बलान–बिहुल सप्तरी टाइगरलाई पराजित गरेर फाइनल पुगेको नमुना ब्लास्टर उसका स्टार खेलाडीमा निर्भर छ । यीनै खेलाडीहरुको दबदबाको प्रभावले फाइनल जित्ने नमुनाका प्रशिक्षक प्रदिपराज पाण्डेले बताए । केही खेलाडी बागमती प्रदेश छनौटमा गएकाले उनीहरुको ठाउमा अन्य राम्रा खेलाडीलाई समावेश गरेकाले उत्कृष्ट प्रदर्शनलाई कायम राख्दै उपाधी जित्न आतुर रहेको कप्तान गौरब कटुवालको भनाई छ ।
लिग चरणमा कमजोर सुरुआत गरेका यी टिमहरुले पछिल्ला खेलहरुमा उत्कृष्ट प्रदर्शन गर्दै फाइनल पुगेकाले प्रदर्शन लगातार उस्तै छैन । स्थानीय समर्थकको साथ रहेको भोक्राहालाई उपाधि नजिक पुर्याउन उत्कृष्ट प्रदर्शन गरेका शेर मल्ल, हेमन्त धामी, किरण ठगुन्ना प्रधानमन्त्री कप छनौट प्रतियोगितामा गएकाले उनीहरुको अभाव खट्किनेछ । यद्यपी उनीहरुको ठाउँमा केही चर्चित खेलाडी खेलाउने तयारीले प्रतिष्पर्धा रोमाञ्चक हुने अपेक्षा गरिएको छ । सिंगल राउन्ड रोविन आधारमा भएको लिग चरणका कुल २१ खेलमा शिर्ष दुईमा रहन सफल यी दुई टिमबिच उपाधी भिडन्त हुन लागेको हो । कोसी प्रिमियर लिग इभेन्ट्स मेनेजमेन्टको आयोजना प्रतियोगिता जारी प्रतियोगिताको विजेताले ५ लाख ५ हजार र उपविजेताले ३ लाख ३ हजार नगद पुरस्कार पाउने प्रतियोगिता संयोजक एवंम सुनसरी जिल्ला क्रिकेट संघका सचिव गोबिन्द पौडेलले जानकारी दिए । प्रतियोगिताको सर्वोत्कृष्ट खेलाडीले २५ हजार पाउदा प्रत्येक खेलको म्यानअफद म्याचले ५ हजार पाएका छन । बेष्ट बलर र ब्याटरले नगद १५–१५ हजार रुपैया पाउने आयोजकले जनाएको छ ।
