सुनसरी–कोसी प्रिमियर लिग क्रिकेट प्रतियोगिताको उपाधि नमुना ब्लास्टरले जितेको छ । शनिवार सम्पन्न फाइनलमा भोक्राहा नरसिंह अर्नाजलाई ३७ रनले पराजित गर्दै इटहरी नमुना कलेजको टिम नमुना ब्लास्टरले उपाधि जितेको हो । सुनसरीको भोक्राहा स्थित डा. खलिल आजाद खेल मैदानमा टस हारेर पहिले ब्याटिङ गरेको नमुनाले दिपेन्द्रसिंह ऐरी र कुशल भुर्तेलको आक्रामक अर्धशतकिय इनिङमा ८ विकेट गुमाउँदै प्रतियोगिताकै २ सय ७ रनको उच्च स्कोर खडा गरेको थियो ।
आक्रामक सुरुवात गरेका ऐरीले ७८ रनको सानदार पारी खेले । ३४ बलको सामना गरेका उनले ८ छक्का र ५ चौका प्रहार गरे । ३४ बलको सामना गरेका भुर्तेलले ३ छक्का र ५ चौकाको मदतमा ५३ रन बनाएर विपिन कुमार महतोको बलमा आउट भए । कुशल मल्लले २२ बलमा अविजित ४३ रनको उत्कृष्ट इनिङ खेले । भोक्राहाका सन्दीप ढुङ्गानाले ३ र भुवन कार्कीले २ विकेट हात पारे ।
जवाफमा २ सय ८ रनको विजयी लक्ष्य पछ्याएर ब्याटिङ गरेको भोक्राहाले ८ विकेटको क्षतिमा १ सय ७१ रन मात्र बनाउन सक्यो । उसका लागि सुजन थपलियाले ३३, रोहण शाहले १२ बलमा ४ छक्काको मदतमा नट आउट ३० रन बनाए । सुमित महर्जनले २९, कप्तान अंकित सुबेदीले २२, शिबम यादवले १६, दीपक बोहराले ११ र आयुष्यमान बमले १० रन बनाए पनि टिमलाई जिताउन सकेनन् । नमुनाका इशान पाण्डेले ३ र कुशल मल्लले २ विकेट लिए ।
उपाधि विजेता नमुना ब्लास्टरले ५ लाख ५ हजार र उपविजेता भोक्रहाले ३ लाख ३ हजार पुरस्कार पायो । नमुनाका दिपेन्द्रसिंह ऐरी म्यानअफद फाइनल घोषित हुँदै नगद ५ हजार पाए । प्रतियोगिताको सर्वोत्कृष्ट खेलाडी भोक्राहाकाका सन्दीप ढुङ्गानाले २५ हजार रुपैयाँ पाए । उत्कृष्ट ब्याटर इटहरी आदर्श जाइन्ट्सका भीम सार्की भए । उत्कृष्ट बलर पूर्वेली सुपरकिंग विराटनगरका दिनेश अधिकारी भए । उनीहरू दुवै जनाले जनही १५ हजार पुरस्कार पाए ।
नमुनाका प्रकाश कार्की र भोक्राहाका भुवन थापा उदयमान खेलाडी घोषित भए ।
फागुन ५ गतेदेखि भएको प्रतियोगितामा सात टिम सहभागी थिए ।
