विराटनगर । विराट गोल्डकपको दोस्रो प्रिक्वाटरफाइनल खेलमा भारतको सुभेदा दिल्ली फुटबल क्लव र सशस्त्र प्रहरी बल एपीएफबीच प्रतिष्पर्धा हुदैछ । खेल बिराटनगरस्थित शहिद रंगशालामा सांझ साढे ६ बजे सुरु हुनेछ । यसअघि हिजो सांझ सम्पन्न तनावपूर्ण उद्धघाटन खेलमा आयोजक रिजाल्को मोरङ एफसीले विजयी सुरुवात गरेको छ । आमन्त्रित भारतको साउथर्न समिति फुटबल क्लव कोलकतालाई आयोजक रिजाल्को मोरङ एफसीले ३–२ गोल अन्तरले पराजित गरेको हो ।
मौसम लिम्बुको निणार्यक गोलले आयोजक रिजाल्को मोरङ एफसी विजयी बनेको हो । विराटनगरस्थित सहिद मैदानमा भएको रात्रिकालीन विराट गोल्डकपको पहिलो खेलको पहिलो हाफमा दुवै टोलीले २–२ गोल गर्दै रोमाञ्चक मोडतिर पुर्याएका थिए ।
पाहुना टोली साउथर्न समितिका दुई खेलाडीले पहिलो हाफको अन्त्यतिर रातो कार्ड भेटेर बाहिरिएपछि खेल केहीबर तनावपूर्ण बनेको थियो । ९ खेलाडीमा सिमित बनेको साउथर्न समितिले दोस्रो हाफमा उत्कृष्ट प्रदर्शन गरेपनि आयोजकलाई असमर्थ बन्यो ।
पहिलो हाफको ११ औं मिनेटमा आयोजकका अभिषेक गुरूङले गोल गर्दै अग्रता दिलाए । त्यसको चार मिनेटमै साउथर्नका सुदिप्त हाल्डेनले गोल फर्काए ।
३८ औं मिनेटमा साउथर्नकै अनिमेसले हेड गरेको बल आयोजकको गोलपोष्टको बाटो समातेपछि अग्रता बनायो । २–१ को अवस्थामा पुगेको आयोजक रिजाल्को मोरङले पेनाल्टीको अवसर सदुपयोग गर्दै दोर्जे तामाङको गोलबाट खेल २–२ को बराबरीमा पुगेको थियो ।
आयोजकलाई ८९ औं मिनेटमा मौसम लिम्बूले गोल गर्दै टिमका लागि जीत सुनिश्चित गरेका थिए । उनी प्लेयर अफ म्याच घोषित भए ।
