विराटनगर । बुढीगंगा गाउँपालिका ५ मा रहेको राठीको उद्योगमा आगलागी भएको छ । मध्यरातमा विद्युत सर्ट भएर भएको आगलागीमा राठी ग्रुपले भर्खरै संचालनमा ल्याएको उद्योग पुर्ण रूपमा जलेर नष्ट भएको छ ।
राजेन्द्र राठीले संचालन गरेको उद्योग मध्ये राठी मेनिफ्याक्चरिङ प्रालिमा आगो लागेको प्रहरी सहायक निरीक्षक दिनेशकुमार श्रेष्ठले जानकारी दिए । राठी ग्रुपले संचालयमा ल्याएको तीन उद्योग मध्ये एउटामा आगो लागेको हो । तीन उद्योग मध्ये अन्नपूर्ण मेनिफ्याक्चरिङ र अन्नपूर्ण ग्लोबल ईन्पेक्स प्रालिलाई प्रहरी र दमकलको सहयोगले क्षति हुनबाट जोगाएको छ । 
विद्युत सर्टका कारण भएको आगलागी नियन्त्रणमा आउन सकेको छैन । मध्यराति १ ः५० बजेदेखि लागेका आगो नियन्त्रणमा लिन विराटनगर, उर्लाबारी, रामधुनि, रंगेली, पथरी, बेलवारी, सुन्दरहरैँचा, ईटहरी, नेपाल आयल निगम, विराटनगर विमानस्थल लगायत १२ वटा दमकलले आगो नियन्त्रणको प्रयास गरि रहेका छन् । आगलागीबाट भएको क्षतिको विवरण आउन बाँकीछ । उद्योगले विद्युतका स्वीच तथा बोर्डहरू बनाउने काम गर्दै आएको थियो ।
