विराटनगर । नेपाल उद्योग वाणिज्य महासङ्घ कोसी प्रदेशको नव निर्वाचित कार्यसमितिको पदस्थापन गरिएको छ। विराटनगरमा एक कार्यक्रमका बिच नव निर्वाचित पदाधिकारीहरूको पदस्थापन भएको हो । नवनिर्वाचित अध्यक्ष राजेन्द्र राउत सहित कार्यकारिणी समितिका पदाधिकारी र सदस्यहरूको पदस्थापन भएको हो । महासङ्घ कोसी प्रदेश समितिका निवर्तमान अध्यक्ष टिकाराज ढकालले नवनिर्वाचित अध्यक्ष राउतलाई पद तथा गोपनीयताको शपथ ग्रहण गराएका थिए । नवनिर्वाचित अध्यक्ष राउतले प्रदेश समितिका पदाधिकारी र सदस्यहरूलाई पद तथा गोपनीयताको शपथ ग्रहण गराएका थिए । २०७९ चैत्र ९ गते झापाको बिर्तामोडमा सम्पन्न नेपाल उद्योग वाणिज्य महासङ्घ कोसी प्रदेश समितिको ५औँ वार्षिक साधारण सभा र तेस्रो अधिवेशनबाट राउत अध्यक्षमा निर्वाचित भएका थिए । अध्यक्ष राउतको वरिष्ठ उपाध्यक्षमा भीम पौडेल, उपाध्यक्षमा कुमार मणि पोखरेल र कोषाध्यक्षमा सुवास आचार्य निर्वाचित भएका थिए । प्रितम खड्गी, प्रकाश सिवाकोटी, ऋषिराज तिम्सिना, वीरेन्द्र साह, धु्रर्वलाल श्रेष्ठ, राजन श्रेष्ठ, दीपक पाण्डे, रविन दाहाल, श्रवण अग्रवाल र भविष श्रेष्ठ कार्यकारिणी समितिको सदस्य पदमा निर्वाचित भएका थिए ।
अध्यक्ष राउतले सङ्कटग्रस्त अवस्थामा रहेको देशको अर्थतन्त्र, उद्योगी व्यवसायीहरूमाथि परेको असर तथा वर्तमान देशको राजनैतिक अस्थिरताका कारण हामी माथि थुप्रै चुनौतीहरू रहेको बताएका छन् । यसलाई समाधान गर्न सबै एक भएर लाग्नु पर्ने बताए ।
उनले अहिले देशको आर्थिक अवस्था विकराल रूपमा रहेको छ, उद्योगी व्यवसायीहरू बैङ्कको ऋण र व्याजबाट त्रसित भएको बताएका छन् । ‘नयाँ लगानी आउन सकिरहेको छैन, देश आर्थिक मन्दीतर्फ उन्मुख भइरहेको छ, उनले भने, यस्तो अवस्थामा नेपाल उद्योग वाणिज्य महासङ्घको भूमिका सक्रिय रूपमा हुनु पर्दछ ।’
