विराटनगर । सप्तकोसी नदीको पुलमा बस र ट्रक ठोक्किँदा भएको दुर्घटनामा ३ जनाको उद्धार भएको छ। ट्रक सप्तकोसी नदीमा खसेको छ। पश्चिमबाट पूर्वतर्फ आउँदै गरेको ट्रक कोसी ब्यारेजको ९ र १० नम्बर ढोकाबाट सप्तकोसी नदीमा खसेको थियो । बिहान ७ः४५ बजेको समयमा पूर्वबाट पश्चिमतर्फ जाँदै गरेको मे १ ख १७६५ नम्बरको बससँग ठोक्किएको मे १ ख ३००७ नम्बरको ट्रक पश्चिमबाट पूर्वतर्फ आउँदै गरेको थियो । एक आपसमा ठोक्किएर भएको दुर्घटनापछि ट्रक सप्तकोसी नदीमा खसेको जिल्ला प्रहरी कार्यालय सुनसरीले जनाएको छ। ट्रक कोसी ब्यारेजको ९ र १० ढोकाबाट सप्तकोसी नदीमा खसेको जिल्ला प्रहरी कार्यालय सुनसरीका प्रहरी उपरीक्षक प्रभु ढकालले जानकारी दिए ।
दुर्घटनापछि सप्तकोसी नदीमा खसेको ट्रकबाट चालक सहित ३ जनाको उद्धार गरिएको छ । उद्धार भएकाहरूमा सर्लाही बाग्मतीका दिनेश खत्री, झापा कनकाईका भोला दाहाल र भारतका उमेश राजपूत रहेको ढकालले जानकारी दिए ।
मानवीय क्षति नभए पनि ट्रक पानीमा डुबेर नदेखिएको प्रहरीले जनाएको छ। यस बारेमा थप अनुसन्धान भइरहेको जिल्ला प्रहरी कार्यालय सुनसरीले जनाएको छ। बसमा सवार यात्रु भने सकुशल रहेको प्रहरीले जनाएको छ।
