विराटनगर । विराटनगर महानगरपालिका न्यायिक समितिले आर्थिक वर्ष २०७९÷०८० मा ८८ प्रतिशत उजुरीको फर्छ्यौट गरेको छ ।
समितिमा दर्ता भएका कुल २३७ उजुरीमध्ये २०९ वटाको फर्छ्यौट गरिएको महानगरका उपमेयर तथा न्यायिक समितिकी संयोजक शिल्पा निराला कार्कीले जानकारी दिइन् । जुन प्रतिशतको हिसाबले ८८ दशमलव १९ प्रतिशत हो । कार्कीका अनुसार सबैभन्दा बढी वडा नम्बर १२ बाट २१ र १८ नम्बरबाट ३ वटा उजुरी दर्ता भएको छ ।
यही आर्थिक वर्षमा साँध सिमाना सम्बन्धी ५५, महिला तथा घरेलु हिंसा सम्बन्धी २९, श्रीमान्–श्रीमती विवाद सम्बन्धी २९ उजुरी परेको छ । त्यस्तै खान लगाउन नदिएको, कुटपिट, दाइजो, लेनदेनसम्बन्धी पनि उजुरी पर्ने गरेको कार्कीले बताउनुभयो । गत आर्थिक वर्षमा दर्ता भएका उजुरीमध्ये २८ वटा मात्रै फर्छ्यौट हुन बाँकी छ । दर्ता भएका मध्ये समितिले ३९ वटा जिल्ला अदालत मोरङमा पठाएको छ । त्यस्तै ४४ वटा मिलापत्र भएको छ । ‘६ वर्षयताकै सबैभन्दा धेरै उजुरीको निर्णय हामीले गरेका छौँ, उपमेयर कार्कीले भनिन्, “मिलेसम्म मिलापत्र गराउँछौँ हामीले धेरै प्रयास गर्दा पनि नमिले अदालत पठाउँछौँ ।’
अघिल्लो आर्थिक वर्ष २०७८÷७९ मा २१० वटा उजुरी दर्ता भएकोमा १७५ वटा उजुरीको निर्णय भएको उपमेयर कार्कीले बताइन् ।
