विराटनगर । नेपाली काँग्रेसका सभापति शेरबहादुर देउवा विराटनगरका पत्रकारको प्रश्नबाट हरेक पटक तर्सिन्छन् । जब विराटनगर आउँछन् अनि पत्रकारहरूको प्रश्नको जवाफ नै दिँदैन दिई हाले भने पनि सहज रूपमा प्रस्तुत हुँदैनन् । पटक पटक विराटनगर विमानस्थलमा पत्रकारले सोधेको प्रश्नको जवाफ दिने क्रममा देउवा विवादमा पर्दै आएका थिए । शनिवार सुनसरीको इनरुवामा आयोजना हुने कार्यक्रममा सहभागी हुन जाने क्रममा विराटनगर विमानस्थलमा पत्रकारहरूले केही प्रश्न सोध्न खोजेका थिए । तर उनी विमानस्थलको भिआइपी कक्षमा नबोली बाहिरिए । भिआइपी कक्षमा विराटनगरका सञ्चारकर्मीहरू उनलाई प्रश्न सोध्ने प्रतीक्षामा थिए । बुद्ध एयरको जहाजमा विराटनगर आएका देउवा भिआइपी कक्षमा बस्दै नबसी बाहिरिएका थिए । तर पनि पत्रकारले उनलाई हिँड्दा हिँड्दै पनि प्रश्न गरिरहे तर देउवा बोलेनन् ।
भिआइपी कक्षबाट बाहिर निस्कँदै गर्दा पनि पत्रकारले प्रश्न गर्न छाडेनन्, ‘संवैधानिक परिषद्को बैठक कहिले राख्नुहुन्छ ?’ देउवाको भनाई थियो ‘जवाफै दिन्न म के, जवाफै दिन्न भनेको ।’ सभापति देउवालाई स्वागत गर्न मोरङ र सुनसरीका नेता कार्यकर्ताहरूको विमानस्थलमा भिड थियो ।
