सुनसरी । सत्तारुढ गठबन्धनबीच कोशी प्रदेशका सभामुख बाबुराम गौतमलाई राजीनामा गराउने सहमति जुटेको छ ।
प्रधानमन्त्री निवास बालुवाटारमा बसेको सत्तारुढ गठबन्धनको बैठकले सभामुखलाई राजीनामा गराएर आफ्नै नेतृत्वमा सरकार गठनको प्रक्रिया थाल्ने अनौपचारिक सहमति गरेको माओवादीका एक नेताले जानकारी दिए ।
प्रदेश प्रमुखले नयाँ सरकार गठनका लागि दिएको समय आज सकिँदैछ । सत्ता गठबन्धनले राप्रपासँग सहकार्यको प्रयास गरेपनि सफल नभएपछि माओवादीबाट सभामुख बनेका गौतमलाई राजीनामा गराएर सरकारको नेतृत्वमा दाबी पेस गर्ने तयारी गरेको हो ।
सत्ता गठबन्धनले यसअघिका मुख्यमन्त्री कांग्रेसका उद्धव थापाकै नेतृत्वमा सरकारमा दाबी गर्ने भएको छ । उम्मेदवारबारे टुंगो नलागे पनि पूर्वसहमति अनुसार थापाकै नेतृत्वमा सरकारमा दाबी गर्ने अनौपचारिक सहमति भएको छ ।
सर्वोच्च अदालतले थापालाई मुख्यमन्त्रीमा गरिएको नियुक्ति बदर गरेपछि प्रदेश प्रमुख पर्शुराम खापुङले बहुमत पुर्याएर आजसम्ममा मुख्यमन्त्रीको दाबी पेस गर्न दलहरुलाई समय दिएका छन् ।
९३ सदस्यीय प्रदेश सभामा बहुमतका लागि ४७ मत आवश्यक पर्छ । तर सभामुखबाहेक कांग्रेस-माओवादी गठबन्धनमा ४६ प्रदेशसभा छन् भने एमालेका ४० र राप्रपाका ६ प्रदेशसभा सदस्य छन् । दुवै पक्षसँग बराबर प्रदेशसभा सदस्य संख्या भएकाले सत्ता गठबन्धनले सभामुखलाई राजीनामा गराएर बहुमत पुर्याउन चाहेको हो ।
प्रदेश प्रमुख खापुङले संविधानको धारा १६८ को उपधारा २ अनुसार सरकार गठनका लागि दिएको समय आज साँझ पाँच बजे सकिँदैछ ।
