विराटनगर । विराटनगरमा निकालिने दक्षिण एसियाकै ठुलो र पुरानो रथ यात्रा श्री राधाकृष्ण रथयात्राको तयारी पुरा भएको छ ।
श्रीकृष्ण जन्माष्टमीको भोलिपल्ट निकालिने ५५ औँ संस्करणको रथ यात्राको तयारी पुरा भएको हो
रथयात्रा सम्पन्न गर्न १८ वटा उपसमितिहरू गठन गरिएको छ । रथयात्राको व्यवस्थापनका लागि भने ५ सय बढी स्वयंसेवकहरू छनौट गरिएको छ ।
रथयात्रामा नेपालबाट मात्रै नभई भारतको बिहार, पश्चिम बंगाल लगायतबाट समेत भत्तालुहरु आउने गरेका छन् ।
कोरोना महामारीका कारण विगतका वर्षमा रथयात्रा प्रभावित हुँदै आएको थियो । अघिल्लो वर्ष निकालिएको रथयात्रा समेत कोरोनाकै कारण प्रभावित भएको थियो । तीन वर्ष अघि परम्परा धान्ने हिसाबले खट यात्रा मात्र निकालिएको थियो ।
यस पटक अवस्था सबै प्रकारले सहज भएकाले श्रद्धालुको सहभागिता बढेन मन्दिर समितिका सदस्य कृष्ण कार्कीले बताए ।
रथयात्राको व्यवस्थापकीय कार्यहरू पुरा भइसकेको र रथको शृङ्गार कार्य भइरहेको मन्दिर समितिका अध्यक्ष एवं मूल समारोह समितिका संयोजक कैलाश रेग्मीले जानकारी दिए ।
मन्दिर परिसरबाट बिहीबार दिउँसो ३ बजेपछि रथयात्रा प्रारम्भ हुने छ । रथले मन्दिर परिसरबाट मेन रोड सहित धरान रोड हुँदै झन्डै ९ किलोमिटर दुरी तय गरी पुनः मन्दिरमा लगेर विसर्जन गरिने तयारी छ ।
यात्राका क्रममा रथलाई ४३ स्थानमा रोकिने छ । श्रद्धालु र भक्तजनका लागि रथ तान्न दुवैतर्फ ७५—७५ फिटको डोरी राखिएको छ । रथयात्राका दिन सधैँ जसो यस पटक पनि विराटनगरमा सार्वजनिक बिदा दिइएको छ ।
