विराटनगर । नेपाली काँग्रेसका वरिष्ठ नेता डा. शेखर कोइरालाले छठ पर्वले राष्ट्रिय एकता बलियो बनाएको बताएका छन् ।
छठ पूजाको अवलोकन गर्न पिचरा नहर पुगेका नेताले कोइरालाले सञ्चारकर्मीसित कुराकानी गर्दै आपसी सद्भावसँगै राष्ट्रिय एकतालाई बलियो बनाएको बताए । उनले छठ पर्वले सबै नेपालीमा एकता, राष्ट्रिय अखण्डता, मेलमिलाप र सहमति कायम गर्ने विश्वाससमेत व्यक्त गरे ।
“धार्मिक तथा सांस्कृतिक विविधताले सम्पन्न हाम्रो मुलुकमा मनाइने यस्ता चाडपर्वले सामाजिक र पारिवारिक जमघट गराउने, मनोरञ्जनको माध्यमबाट आपसी तिक्तता मेटाएर सुमधुर आपसी सम्बन्ध र एकता कायम गर्ने अवसर जुटाइ राष्ट्रिय एकता र सामाजिक सम्मिलनमा महत्त्वपूर्ण योगदान पु¥याएका छन्,” कोइरालाले भने, “यस्ता पर्वले आपसी सद्भाव, सहिष्णुता, भ्रातृत्व र बलियो एकता अभिवृद्धि हुने मैले विश्वास लिएको छु ।”
नेपालभित्र मानिने हरेक पर्वको आफ्नो छुट्टै विशेषता र महत्त्व रहेको उनको भनाइ थियो । अझ छठ पर्वले विशिष्ट महत्त्व र विशेषता बोकेको कोइरालाले बताए । कोइरालाले भने, “हाम्रा यी सबै चाड–पर्व हाम्रो सामाजिक सम्बन्ध र सांस्कृतिक सौहार्दताका धरोहर हुन्, यी चाड–पर्वले सामूहिक भावनालाई अझ विकसित गर्दै, सबैमा एकता र मेलमिलापको आधार खडा गर्न सहयोग पु¥याएका छन् ।”
नेता कोइरालाले अहिले मुलुकको राजनैतिक, धार्मिक, सांस्कृतिक एकतामाथि प्रहार भइरहेको बताउँदै सचेत रहन आग्रहसमेत गरे । प्रतिनिधिसभाका सदस्यसमेत रहेका कोइरालाले व्रतालुहरूलाई भेटेर शुभकामना समेत दिए ।
