विराटनगर । उदयपुरमा स्कुल बस दुर्घटना हुँदा तीनजनाको मृत्यु भएको छ । शनिवार उदयपुर जिल्लाको उदयपुरगढी गाउँपालिका ७ मा पिकनिक खाएर फर्किएको बस दुर्घटनामा परेको छ। घर फर्कँदै गरेको अन्नपूर्ण सेकेन्डरी बोडिङ स्कुलको वाग्मती प्रदेश.०५.००१ ख ००४४ नम्बरको बस अधेरी झर्ना नजिक दुर्घटना हुँदा तीन जनाको मृत्यु भएको प्रहरीले जनाएको छ। दुर्घटनामा त्रियुगा नगरपालिका ५ का बस चालक ४० वर्षीय भिखन चौधरी, त्रियुगा नगरपालिका ६ का ७ वर्षीया सम्या चौधरी र सोही ठाउका ६ वर्षीय विकाश चौधरीको मृत्यु भएको जिल्ला प्रहरी कार्यालय उदयपुरले जनाएको छ।
दुर्घटनामा ३९ जना घाइते भएको जिल्ला प्रहरी कार्यालय उदयपुरका डीएसपी हरिनन्दन चौधरीले जानकारी दिए । स्कुल बस चालकले गाउँको पिकनिकका लागि बस भाडामा लगेको खुलेको छ । घटनालगत्तै डीएसपी चौधरीको नेतृत्वको टोलीले स्थानीयको सहयोगमा घाइतेको उद्धार गरेको छ, केहीलाई थप उपचारकोलागि विराटनगर ल्याइएको प्रहरीले जनाएको छ ।
