विराटनगर । नेकपा एमालेका अध्यक्ष केपी शर्मा ओलीले खोटाङको पङ्खु लप्से खानेपानी आयोजना उद्घाटन गरेका छन् । झुलाघाट चिवाभन्ज्याङ समृद्धिका लागि सङ्कल्प यात्राको क्रममा खोटाङ पुग्नु भएका ओलीले बुधवार बिहान दिक्तेल रुपाकोट मझुवा गढी नगरपालिका ८ मा रहेको सो खानेपानी योजनाको उद्घाटन गरेका हुन् ।कूल ११ करोड रुपैयाँ लागत अनुमान गरिएको सो आयोजनाको पहिलो स्किमको काम सकिएपछि उद्घाटन गरिएको हो। सो आयोजनाका ४२० लाभान्वित घरधुरी रहेका छन्।
मध्य पहाडको आर्थिक, सामाजिक, सांस्कृतिक, धार्मिक अवस्था तथा उद्योग, पर्यटन लगायतको सम्भावना बुझ्न एमाले अध्यक्ष ओलीको नेतृत्वमा वरिष्ठ उपाध्यक्ष ईश्वर पोखरेल, उपाध्यक्षहरू महासचिव शङ्कर पोखरेल, उपमहासचिवहरू, सचिवहरू, स्थायी कमिटी, पोलिटब्युरो, केन्द्रीय कमिटी सदस्यहरू, प्रदेश कमिटी लगायतका नेताहरू, प्राविधिक, विज्ञ सम्मिलित टोली सहित समृद्धिको लागि सङ्कल्प यात्रामा हुनुहुन्छ ।
बैतडीको झुला घाटबाट मङ्सिर १४ गतेदेखि सुरु भएको यात्रा पुस १ गते पाँचथरको चिवा भञ्ज्याङ पुग्ने कार्यक्रम रहेको छ ।
