इटहरी । एमाले अध्यक्ष केपी शर्मा ओली पाँचथरको चिवाभन्ज्याङ पुगेर राष्ट्रिय झण्डा फहराएका छन् । बैतडीको झुलाघाटबाट १८ दिन अघि सुरुभएको समृद्धिका लागि संकल्प यात्रालाई अध्यक्ष ओलीले झण्डोत्तोलन गर्दै समापन गरेका हुन ।
अध्यक्ष ओली फिदिमबाट हेलिकोप्टरमा चिवाभञ्जाङ पुगेका थिए । स्वास्थ्यको कारण देखाउँदै अन्तिम कार्यक्रमका लागि उनी हेलिकोप्टरबाट कार्यक्रम स्थल पुगेका थिए । तर अन्य पदाधिकारी भने सडक मार्ग हुँदै चिवाभन्ज्याङ पुगेका थिए ।
यसअघि संकल्प अभियान गत १४ मंसिरमा बैतडीको झुलाघाटमा पनि झण्डा फहराएर सुरु भएको थियो ।
यात्राका समयमा संकलन भएका सुझाव र समस्याहरूलाई समीक्षा गर्दै समाधानका लागि एमालेले प्रयत्न गर्ने अध्यक्ष ओलीले प्रतिबद्धता व्यक्त गरेका छन् ।
