विराटनगर । कोशी प्रदेशमा श्रम बजार सूचना प्रणालीको सुरुवात भएको छ। रोजगारदाता र रोजगारी खोज्दै आएकाहरूलाई सहज बनाउने गरी श्रम संसार सूचना प्रणालीको विकास गरिएको हो ।
कोशी प्रदेश सरकार सामाजिक विकास मन्त्रालयको आयोजनामा भएको कार्यक्रममा श्रम सञ्चार शुभारम्भ स्विस कनट्याक्ट साथै आसमान नेपालसँगको सहकार्यमा सञ्चालित ‘स्टेप अप’ परियोजना हो । यस परियोजनाले कोशी प्रदेशका विराटनगर महानगरपालिका, इटहरी उपमहानगरपालिकाका र दुहबी नगरपालिकालाई आधार बनाएर काम सुरु गरेको छ । सुनसरी मोरङ औद्योगिक कोरिडोर रहेको ३ पालिकाबाट सुरु भएको यो कार्यक्रम आगामी दिनमा कोशी प्रदेशका १३७ पालिकामा नै पुर्याउने योजना रहेको स्विस कनट्याक्ट कार्यक्रम अधिकृत सागर चापागाईँले जानकारी दिए । ‘यो काम खोज्नका साथै रोज्नका लागि निःशुल्क माध्यम हो, उनले भने, अर्कोतर्फ यो प्रणाली प्रधानमन्त्री तथा मन्त्रीपरिषद्को कार्यालयमा रहेको जिआईडिसिसँग लिङ्क भएकाले पनि हाम्रा डाटाहरू सुरक्षित रहेका छन् ।’
प्रणालीमा हालसम्म ३ हजार ४ सय बढी संस्था तथा व्यक्ती दर्ता भएका छन् । तीन सय बढीले रोजगारीका लागि आवेदन दिँदा ३१ जनाले रोजगारी प्राप्त गरिसकेको सोही अवसरमा जानकारी दिए ।
एप्सबाट बेरोजगार युवाहरूलाई रोजगारीमा समेट्नका साथै स्थानीय स्तरमा हुने तालिमका बारेमा पनि जानकारी प्राप्त गर्न सकिने विश्वास लिइएको स्विस कनट्याक्टका कन्ट्री डाइरेक्टर सञ्जय कार्कीले जानकारी दिए ।
कोशीका मुख्यमन्त्री केदार कार्कीले श्रमको सम्मान गर्न सके मात्र देशको विकास हुने बताएका छन् । बुधवार श्रम बजार सूचना प्रणाली श्रम संचारको सुरुवात गर्दै मुख्यमन्त्री कार्कीले श्रममा ठुलो सानो नहुने बताए । ‘हाकिमदेखि स्वीपरसम्म सबैले आफ्नो काम गरिरहेको अवस्था छ । सबै आफ्नो ठाउँमा दक्ष हुन्छ । आफूले जानेको श्रम ठुलो सानो हुँदैन, कार्कीले भने, श्रममा को ठुलो को सानो हुन्छ र ? त्यस कारण श्रमको सम्मान गर्न जरुरी रहेको छ ।’
मुख्यमन्त्री कार्कीले दक्ष जनशक्ति रोज्नका लागि श्रम संसार महत्त्वपूर्ण साबित हुने उल्लेख गरेका छन् । ‘अब यस क्षेत्रमा कसैले पनि काम गर्ने मान्छे रोजेर पाइने भएको छ, उनले भने, यसले हाम्रो श्रम बजारलाई समेत व्यवस्थित गर्दछ ।’
कार्यक्रममा कोशी प्रदेश सामाजिक विकास मन्त्रालयका सचिव वासुदेव दाहालको अध्यक्षतामा भएको कार्यक्रममा विभिन्न क्षेत्रका व्यक्तिहरूको सहभागिता रहेको थियो । सोही अवसरमा एपलाई व्यवस्थित गर्ने बारेमा कोशी प्रदेश सरकार, स्विस कनट्याक्ट र आसमान नेपालका बिच त्रिपक्षीय हस्ताक्षर भएको छ।
