विराटनगर । पिपलको रुख मुनी केही मानिसहरू भेला भएका छन् । कोही गाडीमा त्यहाँ पुगेका, कोही हिँड्दै आएका अनि कोही आफ्ना साना बाबु नानी च्यापेर त्यस पिपलको बोट मुनी भेला भएकाहरू आमा र बच्चाका समस्याको बारेमा छलफल गर्दै थिए । धनपालथान गाउँपालिका वडा नम्बर २ स्थित ठनठनियाँ बस्तीको बजरंगबली हनुमान मन्दिरसँगै रहेको पिपलको रुख मुनी त्यहीँ गाउँको लालीगुराँस आमा समूहको बैठक चल्दै थियो । आमा समूहका २४ जना आमाहरू र अरू गाउँका महिलाहरूको उपस्थिति देखिन्थ्यो ।
बैठक बसिरहेको ठाउँमा पुगेका थिए जिल्ला समन्वय समिति मोरङका प्रमुख अजम्बर राई तथा उपप्रमुख उषा झा सहितको टोली । आमा समूहको बैठक बसिरहेको स्थलमा पुग्नेमा जिल्ला स्वास्थ्य कार्यालय मोरङका अधिकृत उत्सव पोखरेल र अनिलकुमार देव, गैसस महासङ्घका नवराज निरौला, पत्रकार महासङ्घका नेत्रपी अधिकारी, फेयरमेड फाउन्डेसनका शोभा गुरुङ, विश्वास परियोजना सहारा नेपालका पवनकुमार राई तथा शौरभ बगाले र करुणा फाउन्डेसनकी अम्बिका सरदार पनि त्यही आमा समूहको बैठकको लाइनमा गएर बसे । आमा समूहको बैठकको सहजीकरण गर्दै थिइन् सामाजिक स्वास्थ्य परिचालक उषा ऋषिदेव । आमा समूहको बैठकमा उनैले स्वास्थ्य, सरसफाइ, आमा र शिशुको हेरचाह लगायतको बारेमा जानकारी दिने गर्छिन् ।
आमा समूहमा छलफल हुँदै गर्दा समूहकी सदस्य स्वास्थ्य स्वयम् सेविका रम्भादेवी मण्डलले त्यहाँ रहेका आमाहरूलाई गर्भावस्थाका समस्या, स्वास्थ्य संस्थामा गएर आठ पटक अनिवार्य परीक्षण गर्नु पर्ने, बच्चा जन्मिएपछि परीक्षण र खोप लगाउनु पर्ने बारेमा बताउँदै थिइन् । आमा समूहमा भएको यो छलफल नियाली रहेका जिल्ला समन्वय समिति मोरङका प्रमुख अजम्बर राईले आमा समूहको कामको प्रशंसा गर्दै यस्ता समूहहरू टिकाएर जानु पर्ने बताए । उनले आमा समूहलाई प्रभावकारी बनाउन आमा समूहबाट नै कोष सङ्कलन गर्ने व्यवस्था गरेर जान सकिए दिगो र टिकाउ हुने बताए ।
जिल्ला समन्वय सििमति मोरङ उपप्रमुख उषा झाले समुदाय अनुसार सरसफाईका अभियानहरू चलाइनु पर्ने बताइन् । उनले घर भित्र त्यसमा पनि भान्साको सरसफाइ देखि समुदायको सरसफाईको बारेमा आमाहरूलाई प्रशिक्षण तथा जानकारीको खाँचो रहेकोले त्यस्ता विषयहरू सिकाउनु पर्ने उल्लेख गरिन् ।
फेयरमेड फाउन्डेसनको सहयोगमा सहारा नेपाल र करुणा फाउन्डेसनले सञ्चालनमा ल्याएको विश्वास परियोजनाको बारेमा अनुगमन गर्न जिल्ला स्तरीय अनुगमन टोली त्यहाँ पुगेको थियो । त्यहाँ पुगेको टोलीले आमा समूहसँग स्वास्थ्य र सरसफाइको बारेमा जानकारी लिनुको साथै आमा समूहको प्रभावकारिता, आमा र बच्चाको स्वास्थ्य अवस्थाको बारेमा पनि छलफल गरेको विश्वास परियोजना सहारा नेपालका कार्यक्रम संयोजक पवनकुमार राईले बताए । अनुगमन टोलीले जहदा गाउँपालिका वडा नम्बर २ वैरिया सिमरिया स्थित झोलुङ्गे पुल टोलकी ४५ वर्षीय सिङ्गो मरण्डीलाई समेत भेटेको थियो । मरण्डीको हात्तीपाइलेका कारण खुट्टाको अप्रेसन गरेर अहिले ३ महिना पछि घर फर्काइएको छ ।
परियोजनाले समुदायमा आधारित भएर मोरङ जिल्लाका ७ वटा पालिका र झापाको १० पालिकामा काम गर्दै आएको छ भनेँ स्वास्थ्यमा आधारित कार्यक्रम झापा र मोरङ जिल्लाका सबै पालिकामा सहारा नेपालले गर्दै आएको छ। विश्वास परियोजना अन्तरगत सहारा र करुणा फाउन्डेसनले उष्णप्रदेशीय रोग, मातृ शिशु स्याहार र अपाङ्गता भएका व्यक्तिको स्वास्थ्यमा सुधार ल्याउन र पछाडि परेका समुदायको स्वास्थ्य व्यवहार परिवर्तनमा सुधार ल्याउन काम गर्दै आएको छ ।
