इटहरी । राष्ट्रिय जागृति क्लब इटहरीले लोक गायिका तारा थापालाई सम्मान गर्ने भएको छ । क्लबले प्रत्येक वर्ष काग तिहारको दिन आयोजना गर्दै आएको राष्ट्र सम्मान तथा लोक नृत्य प्रतियोगिताको अवसर पारेर गायिका थापालाई सम्मान गर्न लागिएको हो ।
बुधवार(काग तिहार) दिउँसो इटहरी ९ स्थित जनता मा.विको खेलमैदानमा आयोजना गरिने कार्यक्रममा गायिका थापा सहित विभिन्न क्षेत्रमा योगदान पुर्याउने व्यक्तिहरूलाई सम्मान गरिने क्लबले जनाएको छ ।
क्लबका अध्यक्ष सन्तबहादुर डुम्जनका अनुसार स्रष्टा सम्मान कार्यक्रममा खेलकुद विधा अन्तर्गत फुटबल, क्रिकेट, तेक्वान्दो र सञ्चार क्षेत्र तथा पत्रकारिता क्षेत्रमा योगदान पुर्याउने व्यक्तित्वहरूलाई सम्मान गरिने छ ।
स्रष्टा सम्मानमा सम्मानित हुने गायिका थापाका एक दर्जन बढी गीतहरू चर्चित छन् । उनले गाएका ‘आहा कलिलो तामालाई सोध रामालाई ’, ‘कटर कटरमा तिम्रो सुहाउँदो ज्वाँई आयो मटरमा’ र ‘कति धेरै माया दियौँ ’ लगायतका गीतहरू सदाबहार चर्चित रहँदै आएको छ ।
सोही दिन इटहरी उपमहानगरपालिका विद्यालय स्तरीय खुल्ला लोकनृत्य प्रतियोगिता समेत हुनेछ ।
उक्त प्रतियोगितामा प्रथम हुने विद्यालयलाई नगद २० हजार,दोस्रो हुनेलाई १५ हजार र तेस्रो हुनेलाई १० हजार पुरस्कार पाउने क्लबका अध्यक्ष डुम्बजनले जानकारी दिए ।
२०२३ सालमा स्थापना भएको राष्ट्रिय जागृति क्लबले स्थापनाकाल देखी नै लोकनृत्य तथा सांस्कृतिक कार्यक्रम आयोजना गर्दै आएको छ ।
