विराटनगर । मोरङको ग्रामथान गाउँपालिकाको अध्यक्ष पद कोलागि उम्मेदवारहरूले घरदैलो अभियान सुरु गरेका छन् । नेकपा एमालेले ग्रामथान गाउँपालिका वडा नम्बर १ लखन्तरीबाट घरदैलो अभियान सुरु गरेको हो । नेकपा एमालेका उम्मेदवार तुलसीराम विश्वासलाई लिएर पालिकाका निवर्तमान अध्यक्ष शिवनारायण माझी सहित एमालेका नेता कार्यकर्ताहरू चुनावी अभियान लिएर घरदैलोमा जुटेका हुन् ।
मङ्सिर १६ गतेको निर्वाचनमा सबै एकजुट भएर एमालेका उम्मेदवार तुलसीराम विश्वासलाई जिताउने अभियानमा अघि बढेको बताएका छन् । नेकपा एमाले ग्रामथानका नेता कृष्णकुमार माझीले नेकपा एमालेका उम्मेदवारलाई जिताउने अभियानमा सबै मिलेर लाग्ने बताए । ‘आजदेखि घरदैलो सुरु भएको छ, उनले भने, सबै मिलेर लाग्दा आफ्नो उम्मेदवारले जित्ने पक्का छ।’
निवर्तमान पालिका अध्यक्ष तथा नेकपा एमालेका नेता शिवनारायण माझीले १ नम्बर वडादेखि घरदैलो अभियान सुरु भएको जानकारी दिए । नेकपा एमालेका उम्मेदवारलाई जित्ने र जिताउने गरी सबै एक ढिक्का भएर लागेको बताउँदै उनले आगामी मङ्सिर १६ गते हुने निर्वाचनबाट पालिकाको नेतृत्व फेरी एमालेको हातमा आउने दाबी गरे ।
घरदैलो अभियानबाट सफलताको उचाइमा पुग्ने गरी भोट माग्दै हिँडेको माझीले बताए । नेता, कार्यकर्ता सहित सुरु भएको घरदैलो अभियान बिहीबार नेता चोकबाट सुरु हुने छ । निर्वाचन नजिकिँदै गर्दा नेकपा एमालेले घरदैलो कार्यक्रम सुरु गरेको छ भने नेपाली काँग्रेसले घरदैलोको तयारी गरेको जनाएको छ। नेकपा माओवादीले छलफल र भेटघाट गर्दै आएको छ।
