विराटनगर । ताप्लेजुङमा फुङ फुङ्गे महोत्सव सुरु भएको छ। मिक्वाखोला गाउँपालिकाको साँवा तेम्बामा फङफङदेन पर्यटन विकास समितिको आयोजना र मिक्वाखोला गाउँपालिकाको सहयोगमा ’अध्यक्ष कप तथा फुङफुङ्गे महोत्सव २०८१’ सुरु भएको हो । महोत्सवको कोशी प्रदेश सरकारका उद्योग, कृषि तथा सहकारी मन्त्री खगेनसिं हाङगामले उद्घाटन गरे । महोत्सवको उद्घाटन गर्दै मन्त्री हाङ्गामले ताप्लेजुङ पर्यटनको हिसाबले असाध्यै महत्त्व बोकेको जिल्ला भएको बताए । कोशी प्रदेश सरकारले पर्यटन वर्ष २०८१ घोषणा गरेकोले पर्यटन प्रवर्द्धनको लागि सरकार र आफू लागि परेको बताए । उनले प्राकृतिक तथा सांस्कृतिक स्थालहरु प्रशस्त रहेको ताप्लेजुङको पर्यटनको विकास, प्रवर्द्धन गर्नको लागि फुङ फुङ्गे महोत्सवले महत्त्वपूर्ण सन्देश दिएको बताए । मन्त्री हाङ्गामको उपस्थितिमा तेम्बा देखि फुङफुङ्गे झरनाको अवलोकनसँगै परिक्रमा गरिएको छ ।
कार्यक्रममा मिक्वाखोला गाउँपालिका अध्यक्ष भक्त कार्की, उपाध्यक्ष डण्डु लामा, मेरिङ्देन गाउँपालिका अध्यक्ष युकहाङविर हाङगाम (डम्बर), उपाध्यक्ष दुर्गाहाङ श्रेङ्चोङ्बाङ, फक्ताङ्लुङ गाउँपालिका उपाध्यक्ष रविन साम्रा लिम्बु (विकास) लगायतको सहभागिता रहेको थियो । कार्यक्रममा गाउँपालिकाका अध्यक्षहरूले पालिकामा भएका पर्यटकीय क्षेत्रहरूको प्रवर्द्धनमा जोड दिन मन्त्री हाङ्गामलाई आग्रह गरेका थिए ।
फुङ फुङ्गे अर्थात् फङफङदेन झरना ताप्लेजुङ जिल्लाको मिक्वाखोला गाउँपालिकामा अवस्थित छ । यो असाध्यै आकर्षित झरना हो । ताप्लेजुङ सदरमुकाम फुङ्लिङबाट दुई घण्टा मोटर बाटोको यात्राबाट यो झरना रहेको स्थानसम्म पुग्न सकिन्छ ।
