विराटनगर । मोरङको ग्रामथान गाउँपालिकामा अध्यक्ष पदका लागि भएको उप निर्वाचनमा ७१ प्रतिशत मत खसेको छ । अध्यक्षका लागि भएको निर्वाचनमा १८ हजार ५ सय ७८ मत खसेको प्रारम्भिक तथ्याङ्क आएको मुख्य निर्वाचन अधिकृतको कार्यालयले जनाएको छ । मुख्य निर्वाचन अधिकृतको कार्यालयका अनुसार तथ्याङ्क भेरी फाई गर्ने काम भइरहेको छ । निर्वाचनमा पुरुषभन्दा बढी महिलाले मतदान गरेका छन् । ९ हजार ६ सय १२ जना महिला र ८ हजार ९ सय ६६ जना पुरुष मतदानमा सहभागी भएको प्रारम्भिक विवरण छ ।आयोगका अनुसार प्रारम्भिक विवरणमा थपघट हुन सक्छ । आज बिहान ७ बजेदेखि साँझ ५ बजेसम्म मतदानको समय तोकिएको थियो ।ग्रामथानमा १२ मतदान स्थल र २९ मतदान केन्द्र कायम गरिएको थियो । विभिन्न दलबाट १५ र स्वतन्त्र १ सहित १६ जना उम्मेदवार चुनावी प्रतिस्पर्धामा थिए ।
मतदान सकिएसँगै मतपेटिका सङ्कलनको काम सुरु भएको मोरङका प्रमुख जिल्ला अधिकारी प्रेमप्रसाद भट्टराईले बताए । निर्वाचन शान्तिपूर्ण रूपमा सम्पन्न भएको भट्टराईले बताए । उनका अनुसार मतपेटिका सङ्कलन सकिएपछि मतगणना सुरु गरिने छ ।
सर्वदलीय सहमति जुटेमा आजै रातिबाट मतगणना सुरु गर्ने तयारी छ ।
