विराटनगर । नेकपा माओवादीले सरकारको काम कारबाहीको बारेमा विभिन्न टिप्पणी गर्दै आलोचना गरेको छ। नेकपा माओवादी केन्द्र कोशी प्रदेश संसदीय दलका नेता इन्द्रबहादुर आङ्बोले सरकारका पाँच वटा कामको विषयमा असहमति रहेको जनाए । उनले पत्रकार सम्मेलनमा जानकारी गराएको पहिलो विषय भनेको विपद्को बेलामा भएको क्षतिमा प्रदेश सरकारको भूमिका कमजोर भएको थियो । बागमती प्रदेश पछि सबैभन्दा बढी क्षति कोशी प्रदेशमा भएको बताएका आङ्बोले ६ अर्ब भन्दा बढी भएको क्षति भएको भनिएपछि सरकारको उपस्थिति कतै नदेखिएको टिप्पणी गरे । ‘क्षति पछि सरकारले केही गरेन, कुनै राहत, मर्मत सम्भार र पुन निर्माणका कामहरू भएका छैनन्, उनले भने, ३ महिना बितिसक्दा पनि काम हुन सकेको छैन, सरकारले अभिभावकत्व निभाउन सकेन ।’
अर्को विषय थियो, प्रदेश सरकार र प्रदेश सभाले नचिनेको व्यक्ति मुख्यमन्त्रीको ठाउँमा बसेर बजेट संशोधन गर्छु भनेको विषय । पूर्व मुख्यमन्त्री शेरधन राईलाई लक्षित गरी आङ्बोले संयन्त्रको नाममा अवैध संयन्त्र या व्यक्तिले बजेट पुनरावलोकन गर्छु भन्नू अवैधानिक भएको बताए । मुख्यमन्त्री छेउमा बसेर निरीह हुनु गम्भीरतापूर्वक लिएको उनको भनाइ छ । यो विषयमा उनले सरकारको धारणा माग गरे । ‘कुनै संयन्त्रको नाममा सरकारलाई सहजीकरण गर्नु ठिक हो तर मुख्यमन्त्रीको कुर्सीमा बसेर असंसदीय कुरा गर्नु ठिक हैन, उनले भने, संविधान र कानुनमा नभएको काम अहिले संयन्त्रको नाममा भइरहेको छ ।’
संसदीय दलका नेता आङ्बोले पत्रकार सम्मेलनमा उठाएको तेस्रो विषय भनेँ लगानी सम्मेलनसँग सम्बन्धित थियो । उनले कोशी प्रदेशमा पहिलो पटक हुने लगानी सम्मेलन सरकारले गर्नु पर्ने बताए । सरकारले गर्ने लगानी सम्मेलनले निजी क्षेत्रलाई मिलाएर लग्नु पर्ने आङ्बोको भनाई छ। भएका पूर्वाधारमा नै लगानी सम्मेलन गर्नु पर्ने र कुनै सङ्गठनले आयोजना गर्ने मेलामा टेन्ट मुनि नगर्न उनको सुझाव थियो । उनले खर्चलाई पारदर्शी गरी प्रदेशको निकायबाट नै बजेट खर्च गर्नु पर्ने बताए । लगानी सम्मेलनको तयारी हेर्दा अहिलेसम्म जम्मा ३७ वटा योजनालाई लगानी सम्मेलनमा ल्याउने तयारी भएकोले सम्मेलनको तयारी असाध्यै कमजोर रहेको टिप्पणी गरे ।
चौथो विषय पूर्व मन्त्री लीलाबल्लभ अधिकारीको जापान भ्रमणको विषयसँग सम्बन्धित थियो । आङ्बोले पूर्व मन्त्री अधिकारी जापान जानुमा मुख्यमन्त्रीको लापरबाहीले गर्दा भएको भन्दै सरकारले आफ्नो धारणा अहिलेसम्म सार्वजनिक गर्न नसकेको आरोप लगाए । उनले कोतकला गएका चार जना प्रदेश सभा सदस्यहरू सुन्तला महोत्सवमा जानु गैर कानुनी भएको बताए । उनले कुनै एउटा संस्थाको पहुँचको भरमा सभामुख तथा परराष्ट्र मन्त्रालयलाई जानकारी नदिई पठाएर मुख्यमन्त्रीले सत्ताको दुरुपयोग गरेको आरोप लगाए । आङ्बोले विराट किङ्सलाई दिने भनेको ३० लाखको विषयमा पनि टिप्पणी गरेका छन् । पत्रकार सम्मेलनमा पछिल्लो समय सरकारबाट अनुगमनको नाममा भएको कामले कर्मचारीलाई आतङ्कित पार्ने र अपारदर्शी सरुवाले कर्मचारीलाई हतोत्साहित बनाउने काम गरेको आङ्बोको भनाई छ।
