विराटनगर । उद्योग सङ्गठन मोरङले उद्योग व्यवसायमा कार्यरत जनशक्तिको सुरक्षा सुधार, सुरक्षित कार्यस्थल निर्माण कालागि सम्मेलन आयोजना गरेको छ। व्यवसायजन्य सुरक्षा र स्वास्थ्यको सन्दर्भमा दीर्घकालीन क्षमता अभिवृद्धि गर्ने उद्देश्यले उद्योग सङ्गठन मोरङको आयोजनामा प्रदेश स्तरीय व्यवसायजन्य सुरक्षा र स्वास्थ्य सम्मेलन आयोजना गरिएको हो । सम्मेलनको कोशी प्रदेशका मुख्यमन्त्री हिक्मतकुमार कार्कीले उद्घाटन गरे. । औद्योगिक क्षेत्रले वर्तमान समयमा भोग्नु परेको समस्या र औद्योगिक सुरक्षाका विषयमा प्रदेश सरकार गम्भीर कार्कीले बताए । शुक्रवार सुनसरीको इटहरीमा भएको कार्यक्रममा व्यावसायिक सुरक्षा र स्वास्थ्य व्यवस्थापन प्रणाली विषयक गोष्ठी समेत आयोजना गरिएको थियो । कार्यक्रमलाई सम्बोधन गर्दै मुख्यमन्त्री कार्कीले उद्योग क्षेत्रको विकासका लागि प्रदेश सरकारले निजी क्षेत्र सँग सहकार्य गरिरहेको उल्लेख गरे ।
अहिले देखिएका समस्या समाधान गर्दै, औद्योगिक कामदारले भोग्नु परेका समस्याहरूका विषयमा गोष्ठीको निष्कर्षले मद्दत पुग्ने उनले विश्वास व्यक्त गरे । ‘राज्यले पहल गर्नु पर्नै विषयमा उद्योग सङ्गठन मोरङले कार्यशालाको आयोजना गरेको छ, उनले भने, यसले भइरहेका समस्या समाधानका लागि ठोस निष्कर्ष निकाल्न सहयोग पुग्नेछ ।’ गोष्ठीको निष्कर्ष सरकारलाई औद्योगिक सुरक्षा र स्वास्थ्य सम्बन्धी नीति बनाउनका लागि समेत कोशेढुंगा साबित हुने उनले बताए ।
उद्योग सङ्गठन मोरङसँग प्रदेश सरकारले निरन्तर सहकार्य र अन्तरक्रिया गरिरहेको बताउँदै कार्कीले लगानी सम्मेलन सफल बनाउन पनि सल्लाह दिँदै आइरहेको जानकारी दिए । पछिल्लो समयमा उद्योग सङ्गठन मोरङले व्यावसायिक कुशलता बढाइरहेकोमा प्रंशासा गरे ।
सम्मेलनमा व्यवसायजन्य सुरक्षा र स्वास्थ्यका सम्बन्धमा विशेषज्ञहरू द्वारा कार्यपत्र प्रस्तुति गर्नुका साथै राष्ट्रिय तथा बहुराष्ट्रिय कम्पनीहरूले पालना गरेका उत्कृष्ट अभ्यास, प्रचलित ऐन, कानुनले स्थापना गरेको अनुपालनहरु, अन्तर्राष्ट्रिय मापदण्डहरू, गुणस्तरीय व्यवस्थापन प्रणालीको बारेमा चर्चा गरिने सङ्गठनले जनाएको छ ।
सम्मेलनमा सुनसरी मोरङ औद्योगिक कोरिडोरका विभिन्न उद्योग प्रतिष्ठानका सञ्चालक, व्यवस्थापक, मानव संसाधन प्रमुख, विकास साझेदार स्विस सरकार विकास सहयोग, जर्मन सहयोग, इन्स्योर हेल्भेटास,क्वालिटी एसोसिएसन अफ नेपाल, अकुपेशनल सेफ्टी एन्ड हेल्थ प्रोफेसनल नेपालका प्रतिनिधिहरूको सहभागिता रहेको छ ।
