विराटनगर । झापामा भएको बस दुर्घटनामा ११ जना घाइते भएका छन् । पूर्वपश्चिम राजमार्ग अन्तरगत झापाको शिवसताक्षी नगरपालिका–१ धरमपुरमा आज बिहान नागरिक बस दुर्घटना हुँदा ११ जना घाइते भएको प्रहरीले जनाएको छ। काँकडभिट्टाबाट धरान तर्फ गइरहेको मे १ ख २५४५ नम्बरको ‘नागरिक’ बस अनियन्त्रित भई पल्टिएको प्रदेश प्रहरी कार्यालय विराटनगरले जनाएको छ।
प्रहरीका अनुसार, घाईतेहुनेहरुको टाउको, ढाड र हातमा चोट लागेको छ। घाइतेहरूलाई तत्काल उपचार कोलागि बीएण्डसी अस्पताल, बिर्तामोड पठाइएको छ। घाइते हुनेहरुमा विराटनगर ३ का गुणा कोइराला, दीपा निरौला, विराटनगरकै म्यारी निरौला, निर्मला निरौला, विराटनगर ४ का शर्मिला कोइराला, झिलझिलेका टङ्क सिवाकोटी, विराटनगरका आन्सा फ्यादेन, सुमना लिम्बु, बिर्तामोडका पुष्पलाल अधिकारी, चन्द्रकला अधिकारी र कमल गाउँपालिकाका शान्तिराम खतिवडा रहेका छन् । घाइते मध्ये केहीको अवस्था सामान्य रहेका छन् ।
बसका चालक झापाको मेचीनगर नगरपालिका–१० धुलाबारीका ५४ वर्षीय टीका मेचेलाई इलाका प्रहरी कार्यालय झिलझिलेले नियन्त्रणमा लिएको छ।
घटनास्थल इलाका प्रहरी कार्यालय झिलझिलेबाट करिब २ किलोमिटर पश्चिम पर्छ।
