विराटनगर । उच्च माध्यमिक शिक्षालय सङ्घ (हिसान) मोरङले आयोजना गरेको खेल सप्ताह अन्तरगत बुधवार राती भएको फुटबल प्रतियोगिताको उपाधि विराटनगरको कान्तिपुर कलेज र पथरीको रेड स्टार कलेजले जितेको छ । विराटनगरको शहिदमैदानमा फ्लटलाईटमा भएको रात्रिकालीन छात्र फुटबलको फाइनल खेलमा
कान्तिपुर कलेजले पथरीको रेड स्टार कलेजलाई १–० को गोल अन्तरले पराजित गरी उपाधि जितेको हो । कान्तिपुरको जितमा मध्यान्तर पछिको १४ औँ मिनेटमा गौतम चौधरीले निर्णायक गोल गरे । फाइनल खेलको प्लेयर अफ द फाइनल कान्तिपुरका शिवनारायण चौधरी घोषित भए । हाई स्कोरर कान्तिपुरका गौतम चौधरी, उत्कृष्ट गोलकिपर कान्तिपुरका जीवन चौधरी, उत्कृष्ट डिफेन्स कान्तिपुरका आदित्य राना मगर, उत्कृष्ट मिडफिल्ड रेड स्तरका सौगात राई भए भने उत्कृष्ट प्रशिक्षक कान्तिपुरका कोमल खवास भए । यस अघि भएको छात्रा फुटबलमा साबिक विजेता विराटनगरको अर्किड कलेजलाई पराजित गर्दै पथरीको रेड स्टारले पहिलो पटक छात्रा फुटबलको उपाधि जितेको छ ।
रेड स्टारले अर्किडलाई ३–० को गोल अन्तरले पराजित गरी उपाधि जितेको हो । रेड स्टारको जितमा स्मृति राई, सलिजा राई र आशिका लिम्बुले १–१ गोल गरिन् । फाइनल खेलको प्लेयर अफ द सिरिज रेड स्टारकी स्मृति राई भइन भने हाइ स्कोरर अर्किडकी समीक्षा आचार्य, उत्कृष्ट मिड फिल्डर रेड स्टारकी सलिजा राई र उत्कृष्ट गोलकिपर रेड स्टारकी विद्या लिम्बु घोषित भइन् । विजयी तथा अन्य खेलाडीलाई प्रमुख अतिथि हिसानका केन्द्रीय उपाध्यक्ष भेषराज पोखरेल हिसान कोसी प्रदेशका अध्यक्ष ज्ञानबहादुर खडका, सचिव दिेपेश बास्तोला र हिसान मोरङका अध्यक्ष अमित ढकाललगायतले पुरस्कार तथा ट्रफि वितरण गरे ।
