विराटनगर । मोरङको बुढीगंगा गाउँपालिका वडा नम्बर ३ नेमुवामा रहेको स्मृति इङ्लिस बोर्डिङ स्कुलले विभिन्न कार्यक्रमको आयोजना गरी अभिभावक दिवस मनाएको छ । विद्यालयले १६ औ अभिभावक दिवस तथा विद्यार्थी प्रतिभा प्रस्फुटन कार्यक्रमको आयोजना गरेको हो । अभिभावक दिवसको अवसरमा आयोजित कार्यक्रमलाई सम्बोधन गर्दै कोसी प्रदेश सरकारका सामाजिक विकास मन्त्री पाँच कर्ण राईले विद्यालयहरू प्रतिस्पर्धी बन्नु पर्नेमा जोड दिए । विद्यालयहरू नाफामुखी भन्दा पनि सेवामा केन्द्रित हुनु पर्ने बताउँदै सबै विद्यालयहरूले गुणस्तर कायम गर्न सकेमा भोली उत्पादन हुने जनशक्ति प्रतिस्पर्धी बन्ने बताए ।
सोही अवसरमा राष्ट्रपति रनिङ शिल्ड प्रतियोगितामा सहभागी विद्यार्थीहरूलाई विद्यालयले सम्मान समेत गरेको छ । कार्यक्रममा कक्षा नर्सरी देखि १० कक्षा सम्मका विद्यार्थीहरूको नृत्य प्रस्तुत गरिएको थियो भनेँ विद्यार्थीले सांस्कृतिक कार्यक्रम, नाटक, यान प्रस्तुत गरेका थिए । साथै शिक्षकहरूले नृत्य प्रस्तुत गर्दै विद्यार्थी तथा अभिभावकलाई मनोरञ्जन प्रदान गरेका थिए । कार्यक्रममा विद्यालयकी प्रिन्सिपल रिता न्यौपानेले निक्कै मेहनत र परिश्रमका साथ विद्यालय यो अवस्थामा आई पुगेको बताइन् । विद्यालयले आफ्नो सेवा क्षेत्रका विद्यार्थी र अभिभावकहरूलाई शिक्षालाई गुणस्तरीय बनाउने काममा सहजीकरण गरिरहेको उल्लेख गरिन् ।
