इटहरी । इटहरी उपमहानगरपालिकाका कर्मचारीलाई माफी मगाउने मेयर हेमकर्ण पौडेलले जिम्मा लिए पछि एमाले जनप्रतिनिधिसँग मौखिक सहमति भएको छ ।
आइतबार बस्ने अर्को छलफलबाट प्रशासन शाखा प्रमुख सञ्जिव खड्कालाई माफी मगाउने जिम्मा मेयर ज्यूले लिएपछि आज मौखिक सहमति मात्रै भएको उपमेयर संगीताकुमारी चौधरीले जानकारी दिइन् ।
उपमेयर चौधरीले भनिन्, ‘ आज मौखिक सहमति मात्रै हो, पूर्ण भएको छैन । मेयर ज्यूले कर्मचारीलाई माफी मगाउने मेरो जिम्मा भनेपछि आजलाई मौखिक सहमति भएको हो । अब आइतबार फेरी बसेर लिखित निर्णय हुन्छ । लिखित नभए सम्म हामी मान्दैनौ ’
आजको मौखिक निर्णय आइतबार कार्यान्व्यन नभए हामी पुरानै अडान अनुसार अगाडी बढ्छौँ, उपमेयर चौधरीले स्पष्ट पारिन् ।
विहिबार उपमहानगरपालिकामा मेयर,उपमेयर सहित एमाले जनप्रनितिधि र काँग्रेस पक्षका वडा अध्यक्षहरु बीचको छलफल भएको थियो ।
आजको छलफलमा उपमहानगरपालिकाले भुक्तानी गर्न बाँकी रकमहरु आगामी चैत्र मसान्त सम्म सबै भुक्तानी गरिसक्ने सहमति भएको छ । यस्तै नयाँ योजनाहरुमा सम्झौता गर्नुपर्ने विषय भोली बाटै अगाडी बढाउन सबै वडाहरुमा पत्र पठाउने पनि सहमति भएको वडा अध्यक्ष उमेश सुवेदीले जानकारी दिए ।
अध्यक्ष सुवेदीका अनुसार प्रशासन शाखा प्रमुख सञ्जिव खड्का रहेका वखत गरेका कर्मचारी सरुवा रोक्ने, सरुवा भएर नयाँ ठाउँमा गएर हाजिर गरेका कर्मचारी त्यहीँ कायम गर्ने तथा नगएका कर्मचारीको पुरानै ठाउँमा यथावत रहने पनि मौखिक रुपमा सहमति भएको छ ।
उपमेयर चौधरी कार्यवाहक मेयर भएर गरिएको कार्यापालिका बैठकका निर्णयलाई पनि कार्यान्वयनमा लैजान दुवै पक्ष तयार भएका छन् ।
गत माघ ११ गते प्रशासन शाखा प्रमुख सञ्जिव खड्काले एकलौटी रुपमा कर्मचारी सरुवा तथा सर्वर डाउन गरी आईडी पासवर्ड परिवर्तन गरेको आरोप लगाउँदै कार्यवाहक मेयर संगीताकुमारी चौधरीले ताला लगाइदिएकी थिइन् ।
सो विषयमा उपमेयरले कर्मचारीलाई दुव्र्यहार गरेको भन्दै माफी माग्नुपर्ने माग सहित कर्मचारी ट्रेड युनियनहरु आन्दोलित भएका थिए । यसै क्रममा आज मेयर हेमकर्ण पौडेलले उपमेयर चौधरीले लगाएको ताला फोडेर काम सुचारु गरेका थिए । सो विषयमा उपमेयर सहित एमालेका जनप्रतिनिधिहरु मेयर तथा कर्मचारीसँग असन्तुष्ट रहँदै आएका छन् ।
