विराटनगर । विश्व शान्ति र मानव एकता रक्षाको लागि पाथीभरा (मुकुम्लुङ) मा क्षमा शान्ति पूजाको आयोजना गरिएको छ ।
पाथीभरा क्षेत्रमा लडाइँ झगडा भएको, गोली चलेको, रुख बिरुवा काटिएको भन्दै क्षमा शान्ति पूजा गरिएको आयोजक क्षमा शान्ति सेवा पूजा समितिका संयोजक इन्द्रहाङ्ग पालुङवाले जानकारी दिए ।फागुन ५ गतेबाट सुरु भएको क्षमा पूजा सप्ताहव्यापी रूपमा चल्नेछ ।
क्षमा पूजा २ ठाउँमा गरिदैँछ । पाथीभरा (मुकुम्लुङ) मन्दिर क्षेत्र र हाल केबलकार निर्माण गर्न लागिएको क्षेत्रबाट सय मिटर दक्षिण नाम्सालिङ भन्ने ठाउँमा पूजा हुँदैछ । क्षमा पूजा यज्ञ विधि र धामी विधि दुवै विधिबाट गरिने संयोजक पालुङवाले जानकारी दिए ।
क्षमा पूजा केबलकार निर्माणको पक्ष वा विपक्षमा नभएर विश्व शान्ति र मानव एकता रक्षाको लागि भएको संयोजक पालुङवाले बताए ।
‘ हामी पक्ष वा विपक्ष कसैको पनि होइन, हामीले जल शान्ति, स्थल शान्तिको लागि, सुख्खा खडेरी नलागोस्, अन्नबाली राम्रो होस भनेर क्षमा पूजा गरेको हो । ’ पालुङवाले स्पष्ट पारे ।
पालुङ्वा, पुजारीहरूको सङ्गठनको जिल्ला अध्यक्ष समेत हुन । यस्तो पूजा बर्सेनि गर्ने गरेको उनले बताए ।
क्षमा पूजाको विषयमा अनौपचारिक जानकारी प्राप्त भएको ताप्लेजुङकी सहायक प्रमुख जिल्ला अधिकारी सन्दिपा खड्काले जानकारी दिइन् ।
‘क्षमा शान्ति सेवा पूजा समितिको नाममा पत्र प्राप्त भए पनि दर्ता र चलानी नभएकाले आधिकारिक मान्न सकिएन । तर अनौपचारिक रूपमा लिँदै सुरक्षाको व्यवस्था भने मिलाएका छौँ ।’ सहायक प्रमुख जिल्ला अधिकारी खड्काले भनिन् ।
बलु डाँडामा सशस्त्रको हेल्पडेस्क
पाथीभरा मन्दिरको दर्शनका लागि आउने दर्शनार्थीहरुलाई स्वास्थ्य सेवा दिन सशस्त्र प्रहरीले हेल्प डेस्क तथा मेडिकल रेस्पोन्स डेस्क सञ्चालनमा ल्याएको छ ।
भक्तजनको स्वास्थ्य अवस्थालाई मध्यनजर गरी परीक्षणका लागि हेल्पडेस्क राखिएको सहायक प्रमुख जिल्ला अधिकारी खड्काले जानकारी दिइन् ।
सशस्त्र प्रहरीको सुरक्षा वेश काफ्ले पाटीका सशस्त्र प्रहरी नायब निरीक्षक चन्द्र बहादुर बेघाको कमान्डमा ०५ जनाको मेडिकल तालिम प्राप्त टोलीले सेवा लिने जनाइएको छ ।
यस अघि बलु डाँडामा हेल्पडेस्क राखिएको थिएन ।
