विराटनगर । ताप्लेजुङको पाथीभरा मन्दिरमा केबलकार निर्माणको विरोधमा आन्दोलनमा रहेको मुक्कुम्लुङ संयुक्त सङ्घर्ष समितिले ‘विरोध पदयात्रा’ सुरु गरेको छ ।
सरकारसँगको वार्ता विना निष्कर्ष टुङ्गिए पछि सङ्घर्ष समितिले काठमाण्डौमा पुनः आन्दोलनको घोषणा गरेको थियो । सोही अनुसार ‘विरोध पदयात्रा’ सुरु गरिएको सङ्घर्ष समितिले जनाएको छ । पदयात्रा काफ्ले पाटी पुगेर विरोध सभामा परिणत हुनेछ ।
यो पदयात्रामा राष्ट्रिय मुक्ति पार्टी नेपालका अध्यक्ष राजेन्द्र महतो पनि सहभागी भएका छन् । आज फुङ्लिङ नगरपालिकाबाट पाथीभरा मन्दिरसम्म मुकुम्लुङ केबलकार विरोधी पदयात्रामा उनी सहभागी भएका हुन ।
पदयात्रामा महतोसँगै अन्य पहिचानवादी नेता कार्यकर्ताहरू सहभागी भएका छन् ।
राजेन्द्र महतोले पदयात्राबारे भने, ‘मुकुम्लुङको संस्कृति तथा चोत्लुङ सभ्यता नष्ट गर्ने कार्य कुनै पनि हालतमा सह्य नहुने राष्ट्रिय मुक्ति पार्टी नेपालका अध्यक्ष राजेन्द्र महतोले बताए ।
केबलकार निर्माण कार्य बन्द नभए सम्म सङ्घर्ष जारी रहेन उनले बताएका छन् । उनले सरकारलाई सचेत गराउँदै केबलकार परियोजना रोक्न र स्थानीय सभ्यता जोगाउन आवश्यक कदम चाल्न आग्रह गरेका छन् ।
पाथीभरा क्षेत्रमा केबुलकार निर्माण गर्दा मुन्धुमी संस्कृतिमा असर गर्ने र त्यसले पर्यावरणमा समेत नकारात्मक प्रभाव पर्ने भन्दै विरोध सुरु भएको थियो । विरोधका क्रममा आन्दोलनरत पक्षका पाँच जना घाइते भएपछि सङ्घीय सरकारले वार्ता समेत गरेको थियो ।
तर त्यो वार्तामा भएको सहमति कार्यान्वयन नभएको र माथिल्लो राजनीतिक नेतृत्वसँग मात्रै वार्ता गर्ने माग गरेपछि वार्ता अगाडि बढ्न सकेन ।
सरकारले अर्को वार्ता समिति गठन नगरेको भन्दै ‘नो केबलकार’ पक्षले पुनः आन्दोलन सुरु गरेको हो ।
