विराटनगर । कोशी प्रदेशमा सञ्चालनमा रहेका सञ्चार माध्यमहरुको अवस्थाको अध्ययन र आवश्यक सुधारका लागि सुझाब दिनका लागि नेकपा (एमाले) ले समिति गठन गरेको छ । समितिले प्रदेशभित्र रहेका मिडिया हाउसको दिगो विकास र मिडियाकर्मीहरूको सुरक्षा तथा व्यावसायिकताका विषयमा सुझाव पेस गर्नेछ ।
बिहीबार विराटनगरमा सम्पन्न नेकपा (एमाले) कोशी प्रदेश प्रचार तथा प्रकाशन विभागको दोस्रो बैठकले सुझाव दिनका लागि प्रचार विभागका प्रमुख लक्ष्मण तिवारी, उपप्रमुख भीमज्वाला राई, सचिव यज्ञ शर्मा र सदस्यहरू मोहनकाजी न्यौपाने र सुमन पुरीलाई जिम्मेवारी दिएको छ ।
कोशी प्रदेशमा ५ सय २९ पत्रपत्रिकाहरू र २ सय १६ अनलाइन डिजिटल पत्रिका रहेको तथ्याङ्क रहेको छ । प्रदेशमा पछिल्लो समयमा मिडिया सञ्चालन गर्ने क्रम बढेको भए पनि त्यसको अवस्था र चुनौतीहरू रहेका छन् । ती मिडियाहरूको सुधारका लागि के गर्न सकिन्छ साथै ती सञ्चार माध्ययमहरुमा काम गर्ने सञ्चारकर्मीहरुको अवस्था र भविष्यका बारेमा अध्ययन गरी प्रदेश सरकारका तर्फबाट गर्न सकिने प्रयासहरूका सम्बन्धमा सुझाव प्रस्तुत गरिने प्रचार विभाग प्रमुख लक्ष्मण तिवारीले बताए ।
बैठकका प्रमुख अतिथि कोशी प्रदेशका संस्थापक मुख्यमन्त्री तथा नेकपा (एमाले) स्थायी कमिटी सदस्य शेरधन राईले सञ्चार माध्ययमहरुको पछिल्लो अवस्था राम्रो नभएको र तिनको श्रीवृद्धिमा पार्टी र प्रदेश सरकारले गर्नुपर्ने दायित्वबाट सरकार र पार्टी पछि नहट्ने र आवश्यक सुधारको काममा सधैँ तयार रहने बताए
बैठकमा अनलाइन मिडियाको कोशी प्रदेशको वर्तमान अवस्थाको बारेमा प्रचार विभाग सदस्य सुमन पुरीले अध्ययन प्रतिवेदन पेस गरेका थिए । यस्तै प्रदेशको छापा माध्यमको बारेमा देवेन्द्र कार्कीले प्रस्तुत गरेका प्रारम्भिक प्रतिवेदनहरू उपर छलफल गरिएको थियो । बैठकले प्रदेशमा रहेका मिडियाहरू समाज र सिङ्गो प्रदेशकै साझा सम्पत्ति रहेकाले त्यसको जगेर्नामा पार्टीले विशेष योजना ल्याउने गरी छलफल भएको प्रचार विभागका उपप्रमुख भीमज्वाला राईले बताए ।
