विराटनगर । ताप्लेजुङको पाथीभरामा बिहीबार भएको घटना पछि यातायात स्वरोजगार व्यवसायीहरूले बन्दको घोषणा गरेका छन् । ताप्लेजुङ पाथीभरा यातायात सेवा प्रा.लि.ले एक विज्ञप्ति जारी गर्दै फाल्गुण ९ गते रातको १२ बजेदेखि बन्दको आव्हान गरेको घोषणा गरेको हो ।
उनीहरूले मेची राजमार्ग, तमोर कोरिडोर र धरान–बसन्तपुर–गुफा सडक हुँदै ताप्लेजुङ जिल्ला प्रवेश गर्ने सम्पूर्ण सडक तथा जिल्लाका अन्य शाखा सडकहरूमा समेत चल्ने सम्पूर्ण यातायातका साधन बन्द गरिएको बताएका छन् ।
विज्ञप्तिमा भनिएको छ, ‘फागुन ८ गते काफ्ले पाटी तर्फ स्वास्थ्यकर्मी लिएर जाने क्रममा केबलकार खारेजी पक्षले मे १ ज २५७९ नम्बरको गाडीमा क्षति पुर्याएको तथा चालक राजकुमार पौडेललाई समेत मरणासन्न हुने गरी कुटपिट गरेको घटनाप्रति सवारी चालक मजदुर सङ्घ घोर भर्त्सना गर्दछ ।’
नेपाल सरकारलाई २६० प्रतिशतसम्म भन्सार शुल्क बुझाई चर्को मूल्यमा बैङ्कबाट ऋण लिई किस्ता तिर्दै आत्मनिर्भर हुन रोजगारी गरिरहेको अवस्थामा जीवनयापनको आधारमै क्षति पुर्याएको काम भएको पनि विज्ञप्तिमा भनिएको छ। सङ्घले अमानवीय कार्यप्रति सङ्घले खेद प्रकट गर्दै त्यस्ता गतिविधि गर्नेलाई तुरुन्त कानुन बमोजिम कारबाहीको माग गरेको छ । घाइते चालकको स्वास्थ्य उपचार र सवारी साधनको मर्मत तथा अन्य यातायात मजदुरहरूको जीवन सुरक्षाको प्रत्याभूति गर्न उनीहरूले माग गरेका छन् ।
झापा संयोजक खड्ग श्रेष्ठ, इलाम संयोजक गृष्म सुब्बा, पाँचथर संयोजक मिलन गिरी र ताप्लेजुङ संयोजक दिलीप गुरुङले जारी गरेको संयुक्त विज्ञप्तिमा बन्दमा एम्बुलेन्स, दमकल, दूध र सब्जी बोक्ने बाहेकका अन्य सवारी साधनहरू सञ्चालन गरी गति भएमा आफैँ जिम्मेवार हुनुपर्ने भनिएको छ ।
