विराटनगर । ताप्लेजुङको पाथीभरा क्षेत्रमा केवल कार निर्माणको विषयमा आन्दोलनरत पक्षसँग वार्ता गर्न गठित सरकारी टोली वार्ताबाट समस्याको हल खोज्न आग्रह गरेको छ । सरकारी वार्ता टोलीका संयोजक गृह मन्त्रालयका सह सचिव प्रेम प्रसाद भट्टराईले विज्ञप्ति जारी गर्दै आन्दोलनरत पक्षलाई गम्भीर भई संवादमा आउनका लागि आग्रह गरेका छन् ।
पाथीभरा क्षेत्रमा आन्दोलनरत पक्षले उठाएका धार्मिक,सास्कृतक तथा समुदायको स्थानीय समस्याको समाधानका लागि गम्भीर भई संवादमा आउन वार्ता समितिले आव्हान गरेको छ । सरकारले ताप्लेजुङको पाथीभरा क्षेत्रमा केवल कार निर्माणको क्रममा उत्पन्न समस्या र विवादलाई वार्ताबाट समाधान गर्न भट्टराईको संयोजकत्वमा माघ २० गते वार्ता टोली गठन गरेको थियो ।
सरकारले वार्ता टोली गठन गरेपछि आन्दोलनरत पक्षले पनि अमर तुम्हाङ्गको संयोजकत्वमा वार्ता सहजीकरण समिति गठन गरेको थियो । सरकारी वार्ता टोली र आन्दोलनरत पक्षले गठन गरेको वार्ता सहजीकरण टोलीका बिचमा पटक पटक वार्ता भए पनि समस्याको समाधान हुन सकेको छैन ।
आन्दोलनरत पक्षले कर्मचारी स्तरीय टोलीसँग नभई मन्त्री स्तरीय टोलीसँगमात्रै वार्ता गर्ने माग राख्दै आएको छ । वार्ता छाडेर आन्दोलनमा नो केबलकार पक्ष आन्दोलनमा फर्किएपछि केवल कार निर्माण स्थलमा झडप हुँदै आएको छ ।
