सुनसरी । राष्ट्रपति रामचन्द्र पौडेलले सुनसरीको धरानमा राधाकृष्ण प्रणामी मन्दिरद्वारा निर्मित धर्मशालाको उद्घाटन गरेका छन् ।
राष्ट्रपति पौडेलले मन्दिरमा ब्रह्मलीन बाबाजी श्री १०८ गोपी दासको स्मृतिमा निर्मित गोपी स्मारक ध्यान साधनालयको पनि उद्घाटन गरेका छन् ।
नवनिर्मित कृष्ण प्रणामी धर्मशालाको उद्घाटन गर्दै राष्ट्रपति पौडेलले धर्मशाला मानवीय सेवाको मन्दिर भएको बताए ।
‘यो यस धर्मशाला भवन मानवीय सेवा र भावनाले अभिप्रेरित एउटा अर्कै मन्दिरको स्वरूपमा खडा भएको लाग्यो ।’ राष्ट्रपति पौडेलले भने ।
राष्ट्रपति पौडेलले जुनसुकै धर्म, सम्प्रदाय भए पनि सबैको लक्ष्य भनेको मानव सेवा नै भएको बताउँदै नवनिर्मित कृष्ण प्रणामी धर्मशाला त्यसैको एक उदाहरण भएको बताए ।
धर्मशालामा बीपी कोइराला स्वास्थ्य विज्ञान प्रतिष्ठानमा उपचारका लागि आउने बिरामी, कुरुवा र गरिब तथा असहायलाई निःशुल्क कोठा उपलब्ध गराउने व्यवस्थापन समितिले जनाएको छ ।
मन्दिर स्थापना भएको ५० वर्ष पुगेको अवसरमा १६ कोठे धर्मशाला निर्माण गरिएको मन्दिर व्यवस्थापन समितिले जनाएको छ । एक कट्ठा जग्गामा निर्माण गरिएको धर्मशाला सवा ३ करोड लागतमा निर्माण गरिएको हो ।
कार्यक्रममा कोशी प्रदेशका मुख्यमन्त्री हिक्मतकुमार कार्की, प्रणामी सम्प्रदायका जगद्गुरु श्रीकृष्णमणि महाराज लगायतले शुभकामना व्यक्त गरेका थिए ।
